Söngur á Amtsbókasafninu laugardaginn 31. mars

Næst komandi laugardag, þann 31. mars, mun kórinn syngja á kynningarfundi á vegum Þjóðræknisfélags Íslands og utanríkisráðuneytisins.

Kvennakór Akureyrar syngur við upphaf fundarins.
Atli Ásmundsson aðalræðismaður Íslands í Winnipeg heldur erindi í máli og myndum sem nefnist: Á slóðum Vestur-Íslendinga í Manitoba.
Almar Grímsson fyrrv. form. Þjóðræknisfélagsins heldur stutta kynningu á félaginu.
Kvennakór Akureyrar syngur aftur í lokin.

Sjá nánar á http.//inl.is og á heimasíðu Amtbókasafnsins http://www.akureyri.is/amtsbokasafn/

Kórinn mun halda á slóðir VesturÍslendinga næsta sumar og syngja m.a. á Íslendingadeginum í Gimli.

Söngur á Dvalarheimilunum Kjarnalundi og Hlíð

Kvennakórinn ætlar að heimsækja heimilisfólkið í Kjarnalundi sunnudaginn 25. mars um kl. 15:30. Þar verða sungin nokkur lög og að því loknu haldið að Hlíð og sungið fyrir fólkið sem þar á heima um kl. 16:15.

Að þessu loknu tekur kórinn til við sína hefbundnu sunnudagsæfingu, en að þessu sinni í Dvalaheimilinu Hlíð.

Vel heppnaður æfingadagur að baki

Laugardaginn 10. mars héldu gallvaskar Kvak-konur af stað frá Akureyri um kl. hálf níu að morgni og var ferðinni heitið í Valsárskóla á Svalbarðsströnd.

Tilgangurinn með ferðinni var að syngja og æfa sig allan liðlangan daginn undir dyggri stjórn kórstjórans Daníels Þorsteinssonar. Fyrst var æft af kappi til hádegis en þá var tekið til við hinar frábæru kræsingar Kvenfélags Svalbarðsstrandar, sem nú sem fyrr tók að sér sjá kórnum fyrir mat og drykk.

Að því búnu var aftur tekið til við söngæfingar, en í næsta hléi var mætt Eva Reykjalín, danskennari með meiru sem sá til þess að hrista duglega upp í mannskapnum með hressilegum danssporum.

Aftur var sest að kræsingum frá kvenfélaginu og nú voru veitingarnar á við meðal fermingarveislu. Samt sem áður var sungið og æft fram til kl. 5, þá var haldið heim eftir vel heppnaðan dag.

Æfingar á vorönn komnar á fullt

Æfingar kórsins eftir jólafrí hófust 8. janúar og er nú tekist á við nýtt prógramm fyrir vortónleika sem væntanlega verða fleiri en einir í maí.
Einnig er nú æft fyrir ferð kórsins á Íslendingadaginn í Kanada sem verður í byrjun ágúst.

Kórinn syngur ásamt Karlakór Akureyrar Geysi á þorrablóti heimilisfólks á Hjúkrunar- og dvalarheimilinu Hlíð n.k. föstudag 10. febrúar og síðar í vetur mun kórinn einnig syngja aftur í Hlíð og í Kjarnalundi.

Æfingardagur mun verða haldinn í mars en nánar verður sagt frá kórstarfinu jafnóðum.

Gleðilegt nýtt ár!

Kvennakór Akureyrar óskar kórfélögum, stjórnendum
fyrr og nú, undirleikurum, einsöngvurum,tónleikagestum
og öllum velunnurum gleðilegs nýs árs með kærum
þökkum fyrir liðið ár.

Fyrsta æfing kórsins á árinu 2012 er sunnudaginn 8. janúar
og dagskrá vorannar komin hér á tengilinn DAGSKRÁ

Gleðileg jól !

Kvennakór Akureyrar óskar kórfélögum, stjórnendum fyrr og nú, undirleikurum, einsöngvurum, tónleikagestum og öllum velunnurum gleðilegra jóla og farsæls nýs árs með kærum þökkum fyrir árið sem brátt er á enda runnið. Hittumst heil á nýju ári !

Kórsöngur í miðbænum á laugardag

Hinn hefðbundni miðbæjarsöngur fyrir jólin verður á laugardaginn kemur.  Kvennakór Akureyrar syngur kl. 16:30 syðst í göngugötunni en annars er þetta kóramót sem hefst kl. 15:00 við GS og færist suður göngugötuna til kl. 17:00. Fjölmargir kórar og leikhópar taka þátt í þessari skemmtilegu uppákomu Miðbæjarsamtakanna á Akureyri! Og hvað er jólalegra en kór, kuldi og kakósopi? eins og segir í auglýsingu samtakanna.

Styrktartónleikar – Hjálpum þeim að hjálpa

Frá hausti 2003 hefur Kvennakór Akureyrar í samvinnu við aðra kóra og tónlistarmenn haldið aðventutónleika til styrktar Mæðrastyrksnefnd Akureyrar. Þar leggja allir sitt af mörkum og gefa vinnu sína til að styrkja gott málefni og rennur ágóðinn óskiptur til Mæðrastyrksnefndarinnar.
Í ár verða haldnir veglegir tónleikar í Hamraborginni í Hofi. Þá fær kórinn til liðs við sig góða gesti, þau

alt     alt
     Guðrúnu Gunnarsdóttur    og        Ívar Helgason.

og auk þess hljómsveit skipaða þeim Aladár Rácz á píanó, Pétri Ingólfssyni á kontrabassa og Emil Þorra Emilssyni á slagverk, stjórnandi er Daníel Þorsteinsson.

Vonast er til að sem flestir sæki þessa tónleika og leggi þar með sitt af mörkum til að hjálpa þeim sem lítið eða ekkert hafa til að halda sín jól.

Tónleikarnir eru í Hofi fimmtudaginn 8. desember kl. 20:00. Miðaverð er kr. 3000.- en frítt fyrir 14 ára og yngri. Nánari upplýsingar og miðasala eru á www.menningarhus.is

Afmælistónleikar gengu stórvel

10 ára afmælistónleikar í Hömrum í Hofi

10 ára afmælistónleikarnir s.l. laugardag gengu mjög vel og söng kórinn fyrir fullum sal í Hömrum í Menningarhúsinu Hofi.

Góður rómur var gerður að upprifjun á eldri lögum kórsins og ekki síður að nýrri lögum undir stjórn Daníels Þorsteinssonar.  Frumflutt var nýtt lag eftir hann við Árstíðirnar, texta Önnu Dóru Gunnarsdóttur, kórfélaga og var það flutt aftur í lok tónleika ásamt perlunni Tvær stjörnur eftir Megas.

Um kvöldið fögnuðu kórfélagar, stjórnendur og gestir afmælinu í Hlíðabæ, við mat, skemmtiatriði og dans fram á nótt.

Afmælistónleikarnir laugardag 19. nóv.

Það er að koma að því !

Kórinn heldur upp á 10 ára afmæli sitt með veglegum afmælistónleikum í Hömrum í Menningarhúsinu Hofi laugardaginn 19. nóv. kl. 15:00.

Þar mun kórinn stikla á stóru yfir þessi 10 viðburðarríku ár og flytja lög sem spanna sögu kórsins. Einnig mun hann frumflytja afmælislagið Árstíðirnar með texta Önnu Dóru Gunnarsdóttur kórfélaga við lag Daníels Þorsteinssonar stjórnanda kórsins. Með kórnum á tónleikunum spilar hljómsveitin Aladár Rácz á píanó, Pétur Ingólfsson á kontrabassa og Emil Þorri Emilsson á slagverk.

Miðaverð á tónleikana er 2000 og hægt að kaupa miða á www.menningarhus.is eða í afgreiðslunni í Hofi. Frítt er fyrir 14 ára og yngri.