Sagan 2014-2015

Saga kórsins 2014– 2015

Byggð á skýrslu stjórnar 2014 – 2015

 

Ný stjórn var kosin á aðalfundi vorið 2014. Una Þórey Sigurðardóttir lét af formannsembættinu og skilaði því af sér með sóma. Stjórnin var þannig skipuð starfsárið 2014 – 2015: Formaður Arnfríður Kjartansdóttir sópran 1, varaformaður Kamilla Hansen sópran 2, gjaldkeri Anna Sigurðardóttir sópran 2, ritari Valdís Þorsteinsdóttir sópran 1 og meðstjórnandi og lyklapétur Þórunn Jónsdóttir alt 1.
Raddformenn voru Stella Sverrisdóttir í sópran 2, Guðrún Hreindís Hreinsdóttir í alt 1 og Lilja Jóhannsdóttir í alt 2. Enginn vildi taka þetta embætti að sér í sópran 1.

 

Auka aðalfundur var haldinn 28. september 2014 og framvegis verður aðalfundur haldinn á þeim tíma og reikningsárið verður það sama og starfsárið, þ.e. 1. september til 31. ágúst.

 

Starf vetrarins 2014-2015 hófst með nokkuð hefðbundnum hætti, auglýst var eftir nýjum söngröddum í Dagskránni og raddprufur voru haldnar fyrir fyrstu tvær æfingarnar í byrjun september. 10 konur mættu í raddprufur og héldu flestar áfram, en álíka margar tóku sér frí eða hættu alveg í kórnum. Æfingar voru í Brekkuskóla eins og áður.

 

Kórnum barst tilboð um að taka þátt í „Karlakóramóti“ í Mosfellsbæ 8 nóvember 2014 og miðuðust æfingar haustsins að því að syngja sem best þar. Þátttaka í ferðinni suður var mjög góð og gaman hvað karlakórarnir voru jákvæðir í okkar garð. Karlakórinn Stefnir í Mosfellsbæ hafði frumkvæði að þessu móti og bauð okkur í Kvak, Karlakór Kópavogs og Söngbræðrum frá Borgarnesi að vera með. Hver kór söng 4 lög og síðan 3 lög saman allur hópurinn. Tónleikarnir voru haldnir í íþróttahúsinu að Varmá og kvöldverður og skemmtun var síðan í Hlégarði. Ferðanefnd Kvennakórsins stóð sig að venju með prýði og skipulagði rútuferð og gistingu tvær nætur í Borgarnesi.

 

Jólatónleikar voru á öldrunarheimilum Akureyrarbæjar, Hlíð og Lögmannshlíð þann 7. desember og síðan hafði skemmtinefndin skipuð sópran 2 skipulagt vel heppnuð Litlu jól í Kaffihúsinu í Lystigarðinum eftir að við vorum búnar að syngja fyrir gamla fólkið okkar.

 

Stjórn og ferðanefnd stungu upp á utanlandsferð sumarið 2015, en fallið var frá því af ýmsum ástæðum, meðal annars vegna þessa að þetta þótti stuttur fyrirvari. En ferðaáætlunin er tilbúin og ákveðið að fara samskonar ferð til Króatíu í júní 2016.

 

Í janúar fengum við skemmtilegt verkefni þar sem einn kórfélagi bað þær sem sæju sér fært að syngja í afmælisveislu sem hún hélt í kaffihúsinu í Lystigarðinum.

 

Þorrasöngur var 6. febrúar í Hlíð og Lögmannshlíð í samstarfi við félaga úr Karlakór Akureyrar-Geysi. Þetta er viðburður sem er að skapast hefð á, en söngfólkið skiptir sér í minni hópa og fer á allar deildir og syngur þorralög fullum hálsi.

 

Æfingabúðir voru á Húsabakka í Svarfaðardal helgina 28. febrúar til 1. mars 2015. Mæting var 9:30 útfrá á laugardeginum og síðan var sungið og hlegið meira eða minna þar til kl. 15 á sunnudeginum þegar dagskránni lauk. Tilraun var gerð með nýja tegund af hópefli, X-faktor keppni kvennakórsins þar sem kórkonum var skipt í lið 10 dögum áður og hvert lið undirbjó eitt lag sem flutt var á kvöldvöku á laugardagskvöldinu. Nýtt fyrirkomulag var á matarmálum þar sem nokkrar konur tóku að sér að sjá um innkaup og eldun.

 

Eftir áramót fór allt á fullt að æfa metnaðarfullt prógram vortónleika undir yfirskriftinni Dívur og drottningar. Við fengum einsöngvarana Þórhildi Örvarsdóttur og Ívar Helgason í lið með okkur og undirleikarana Aladár Rácz á píanó og Pétur Ingólfsson á bassa. Tónleikarnir voru í Hofi, salnum Hömrum annan í hvítasunnu, 25. maí. Góð aðsókn var og tókust tónleikarnir með ágætum.

 

Árshátíð var haldin í Lundi þann 18. apríl. Skemmtinefndin hafði veg og vanda af undirbúningi, hver rödd kom með skemmtiatriði og Hermann Arason spilaði fyrir dansi.
Starfsárinu lauk síðan með þátttöku Kvennakórs Akureyrar í hátíðahöldum í tilefni af 100 ára afmæli kosningaréttar kvenna. Sungin voru nokkur lög í Lystigarðinum, síðan leiddur söngur í skrúðgöngu niður á Ráðhústorg og þar tókum við þátt í gjörningi ásamt dönsurum sem Ásdís Alexandersdóttir stýrði.
Fjáraflanir voru með minnstu móti, enda nýafstaðin styrkjasöfnun fyrir landsmótið vorið 2014. Styrkur sem kórinn hefur fengið frá Akureyrarbæ hefur breyst þannig að í stað þess að fá ákveðna upphæð fast árlega, þarf nú að sækja um styrki þaðan til ákveðinna verkefna.

 

Tölfræði:
Kóræfingar á starfsárinu voru 30
Raddirnar stóðu sjálfar fyrir raddæfingu hver fyrir sig einu sinni.
Æfingabúðir voru einu sinni og komu í staðinn fyrir æfingadaga.
Tónleikar: 6 ef allt er talið með, þ.e. tvennir jólatónleikar, söngur í veislu, lystigarðurinn, karlakóramótið í Mosfellsbæ og svo vortónleikarnir.
Almennir kórfundir voru tvisvar, þ.e. einn aukaaðalfundur og svo fundur í æfingabúðunum.
Stjórnarfundir augliti til auglitis voru 9, þar af var stjórnandi með þrisvar, umræðuþræðir í lokuðum hóp stjórnar á facebook voru ótal margir, minnst 30.

Saga kórsins

Fyrstu drög að kórnum ná aftur til ársins 1997 þegar hópur kvenna tengdar íþróttafélaginu KA ákvað að stofna blandaðan kór sem syngi aðallega létta dægurtónlist. Illa gekk að fá karlaraddir í kórinn, og var honum þá breytt í kvennakór. Veturinn 2000-01 voru aðeins 16 kórfélagar starfandi og því var ákveðið að kynna starfsemina með söng á kaffihúsinu Bláu Könnunni og auglýsa um leið eftir kórfélögum í nýjan kvennakór. Viðbrögð voru á þann veg að kórfélögum fjölgaði í 100 manns á næstu vikum.

Á aðalfundi árið 2001 var ákveðið að gefa kórnum formlega nafnið Kvennakór Akureyrar og síðan þá hefur tala kórkvenna rokkað frá 60 – 80. Frá byrjun og til ársins 2003 var stjórnandi kórsins Björn Leifsson, en þá tók við stjórn Þórhildur Örvarsdóttir og stjórnaði í tvö ár. Haustið 2005 tók svo við stjórn Arnór H. Vilbergsson og stjórnaði til hausts 2008, en þá tók Jaan Alavere við í eina önn. Frá vorönn 2009 hefur Daníel Þorsteinsson verið stjórnandi kórsins og undirleikari.  Kórinn flytur íslensk og erlend lög og er með metnaðarfulla og fjölbreytta dagskrá.

Kvennakór Akureyrar heldur aðaltónleika á Akureyri að vori ár hvert, auk jólatónleika þar sem kórinn syngur, í samvinnu við aðra kóra eða söngvara, jólalög til styrktar Mæðrastyrksnefnd Akureyrar. Einnig er sungið við ýmis önnur tækifæri. Fyrir lok hvers starfsárs hefur kórinn farið í styttri ferðalög og haldið tónleika í nágrannasveitum eða öðrum bæjarfélögum.

Kórinn hefur þrisvar farið í utanlandsferðir til tónleikahalds. Sumarið 2005 lagði kórinn upp í sína fyrstu utanlandsferð og var ferðinni heitið til Slóveníu. Tókst sú ferð afar vel, haldnir voru þrennir tónleikar og landið skoðað vítt og breitt. Vorið 2008 gaf kórinn út sinn fyrsta geisladisk, sem hlaut nafnið Sólardans á vori og um sumarið var farið í aðra söngför og nú til Eistlands. Sú ferð tókst einnig mjög vel, haldnir voru þrennir tónleikar og auk þess var lagið tekið við ýmis tækifæri. Gist var í þremur borgum, og farnar skoðunarferðir um landið. Sumarið 2012 var haldið til Kanada og þar tekið þátt í hátíðahöldum Íslendingadagsins í Gimli auk fleiri tónleika í Kanada og Norður-Ameríku. Um allar þessar ferðir og um starf hvers árs má lesa hér á síðunni undir tenglinum Sagan.

Sagan 2013-2014

Frá hátíðartónleikum á Landsmóti íslenskra kvennakóra í maí 2014 í Hofi

Saga kórsins 2013 – 2014
Byggð á skýrslu stjórnar 2013 – 2014

Breyting varð í stjórnarliði Kvennakórs Akureyrar á aðalfundi,  29. maí 2013. Eygló Arnardóttir gekk úr stjórn og í hennar stað kom Þórunn Jónsdóttir. Áfram sátu í stjórn; Anna Breiðfjörð Sigurðardóttir, Arnfríður Kjartansdóttir, Kamilla Hansen og Una Þórey Sigurðardóttir.

Landsmót íslenskra kvennakóra var mál málanna hjá kórnum starfsárið 2013-2014. Undirbúningur og framkvæmd mótsins var langstærsta verkefnið sem Kvennakór Akureyrar hafði ráðist í frá upphafi. Segja má að undirbúningurinn hafi hafist strax á Selfossi vorið 2011 þegar opinbert varð að næsta landsmót yrði haldið af Kvennakór Akureyrar á  Akureyri vorið 2014. Landsmótsnefnd, skipuð valkyrjunum, Önnu Breiðfjörð Sigurðardóttur, Hólmfríði Þorsteinsdóttur og Snæfríði Egilsson, sá um skipulagningu og undirbúning frá upphafi og nutu þær aðstoðar annarra kórkvenna eftir þörfum. Kórinn vann ötullega undir stjórn nefndarinnar að þessu mikla verkefni sem lauk með landsmóti íslenskra kvennakóra á Akureyri dagana 9. – 11. maí.

Kórstarfið hófst með seinna móti þetta haustið og byrjaði með hópefli á Húsabakka í Svarfaðardal dagana 20. og 21. september. Tilgangur hópeflisins var að auka samheldni og þjappa kórkonum betur saman fyrir komandi verkefni, þ.e. undirbúning landsmóts. Dagana fyrir hópeflið unnu konur saman í hópum að ýmsum verkefnum og söfnuðu stigum af miklu kappi.  Arnfríður Kjartansdóttir skipulagði hópastarfið með miklum ágætum. Verkefnavinnan og hópeflið á Húsabakka heppnaðist mjög vel og verður í minnum haft. Fyrsta kóræfing haustsins var sunnudaginn 22. september.

Söngverkefni utan hefðbundinna tónleika bjóðast kórnum af og til. Að þessu sinni bauðst kórkonum að syngja í brúðkaupi í ágúst og höfðu þær mikla ánægju af.

Akureyrarvaka var að venju haldin í lok ágúst. Kvennakór Akureyrar tók þátt í dagskrá sem fram fór í Lystigarðinum föstudagskvöldið 30. ágúst.  Þar söng kórinn meðal annars angurvært ljóð um hin rauðu fögru reyniber í hauströkkrinu og endaði með suðrænum söng ættuðum frá Afríku. Eflaust hefur söngurinn yljað einhverjum um hjartarætur í norðankælunni sem þá gekk yfir.

Æfingadagur að hausti var 26. október. Eins og oft áður var hann í Valsárskóla og í kórinn í fæði hjá kvenfélagskonum á Svalbarðstöndinni. Að þessu sinni aðstoðaði Helena Bjarnadóttir Daníel kórstjóra við söngæfingarnar. Sama dag fór fram í Reykjavík, aðalfundur Gígjunnar, sambands íslenskra kvennakóra.  Þær Anna og Snæfríð í landsmótsnefndinni fóru á fundinn og héldu vel heppnaða kynningu á landsmóti íslenska kvennakóra.

Árlegir mæðrastyrkstónleikar voru haldnir í Akureyrarkirkju  laugardaginn 7. desember. Að þessu sinni tóku kvennakórarnir Embla á Akureyri og Kvennakórinn Sóldís í Skagafirði þátt í tónleikunum ásamt Kvennakór Akureyrar. Þarna söfnuðust 313.400.- kr  sem  afhentar voru forstöðukonu Mæðrastyrksnefndar Akureyrar og nágrennis í tónleikalok. Tónleikarnir heppnuðust mjög vel og söng kóranna var vel tekið af áheyrendum enda ekki oft sem þrír kvennakórar syngja saman á tónleikum.

Að tónleikum loknum fóru KvAk konur á veitingastaðinn Örkina hans Nóa og héldu sitt árlegu jólateiti. Þar var snæddur jólagrautur og skemmtu kórkonur sér konunglega fram eftir kvöldi.  Mikla kátínu vakti einstaklega hláturmildur jólasveinn sem kitlaði hláturtaugar kórkvenna rækilega.  Skemmtunin var skipulögð af sópran 1 sem sá um skemmtanahald kórsins þennan vetur og nefndu sig „Í HÆSTU HÆÐUM“.

Sunnudaginn 8. desember fóru kórkonur milli deilda á Öldrunarheimilinu Hlíð og sungu gömul og góð jólalög fyrir heimilisfólk. Að þeim söng loknum var haldið í Öldrunarheimilið Lögmannshlíð og sungið þar einnig. Undirleikarar voru þær Hildur Petra, Soffía og Þórunn Jóns. Að syngja á Öldrunarheimilum Akureyrar er með því ánægjulegasta sem við  KvAk konur gerum. Þakklátari áheyrendur en þetta aldna fólk eigum við ekki og það var gott að fara í kórjólafrí eftir svona kærleikssöng.

Fyrsta æfing á árinu 2014 var sunnudaginn 5. janúar og hófust þá æfingar fyrir landsmótið af fullum þunga. Kórkonur skiptu sér í allar sex smiðjur landsmótsins og þurftu því að æfa alls 22 lög.

Söngæfingahelgi var haldin að Húsabakka í Svarfaðardal  helgina 25. –  26. janúar. Það var sungið, lært og mikið hlegið. Á laugardagskvöldinu var haldin kvöldvaka sem stelpurnar  ,,Í HÆSTU HÆÐUM,, skipulögðu. Kórkonur sáu sjálfar um allan mat, hver rödd hafði sitt hlutverk í eldamennsku og framreiðslu. Þetta fyrirkomulag heppnaðist mjög vel, bæði hvað varðar fjárhag og skipulag. Sigrún Magna Þórsteinsdóttir var Daníel til aðstoðar á laugardeginum.

Það er orðin hefð að Karlakór Akureyrar – Geysir og Kvennakór Akureyrar syngi saman á þorrablóti heimilisfólksins í Hlíð. Þorrablótið var haldið föstudaginn 14. febrúar og að þessu sinni sungu báðir kórarnir einnig í Lögmannshlíð. Það mátti ekki á milli sjá hverjir skemmtu sér betur, áheyrendur eða flytjendur.

Æfingadagur að vori var haldinn laugardaginn 12. apríl. Að þessu sinni var ekki farið úr bænum og fengum inni í sal Menntaskólans á Akureyri.

Landsmót íslenskra kvennakóra var haldið á Akureyri dagana  9. – 11. maí eins og áður segir. Það var óumdeilanlegur hápunktur starfsársins. Mótið þótti takast afar vel í alla staði og þar skilaði sér öll sú mikla vinna sem kórkonur, stjórnandi  og ekki síst landsmótsnefnd lagði á sig. Mótið stóð yfir frá föstudegi til sunnudags og æfingar stóðu yfir á 6 stöðum í einu. Tónleikur voru bæði á laugardegi og sunnudegi í Menningarhúsinu Hofi og hátíðarkvöldverður og dansleikur í Íþróttahöllinni á laugardeginum. Ríflega 700 konur prýddu bæinn á meðan á mótinu stóð og komu þær úr öllum landshlutum og einn gestakór kom frá Mandal í Noregi.

Vortónleikar voru haldnir í Laugarborg  á uppstigningadag, 29.maí og þar var boðið upp á frían aðgang og kaffiveitingar og meðlæti að tónleikunum loknum. Með þessum tónleikum var ætlunin að þakka öllum þeim sem hjálpuðu okkur við framkvæmd landsmótsins.

Síðasta verkefni KvAk þessa starfsárs var að taka þátt í hátíðadagskrá í Lystigarðinum 17. júni.

Fjáraflanir. Engar venjulegar fjáraflanir voru á vegum kórsins en þeim mun meira leitað eftir styrkjum til stofnana og fyrirtækja. Kórkonur voru mjög duglegar og útsjónarsamar í þessum efnum, bæði við að safna styrkjum í allskonar formi svo og auglýsinga í mótsblaðið.  Nefndastörf voru líka með öðru sniði, allar kórkonur höfðu sitt verkefni í nefndum sem tengdust skipulagningu og framkvæmd landsmóts á einn eða annan hátt.

Heimasíðan var uppfærð eftir áramót og útliti hennar breytt í takt við nýja tíma. Heimasíðan gengdi mikilvægu hlutverki í að miðla fréttum og upplýsingum varðandi landsmótið.

Kórpallar bættust við  veraldlegar eigur Kvennakórs Akureyrar. Ættingjar og puntstrá kórkvenna sáu alfarið um smíðina og var kostnaður við pallana lítið meiri en efniskostnaðurinn.

Nokkur hreyfing var á liðsheild kvennakórs Akureyrar á  árinu. Það bættust við nýjar konur og aðrar hættu. Auglýst var eftir nýjum og ferskum röddum í kórinn í byrjum september með góðum árangri. Alls mættu 10 konur í raddprufur í haust og tvær bættust við eftir áramót. Í nýliðahópnum  voru tvær þýskar háskólastúlkur sem voru við nám og starf hér á Akureyri og sungu með okkur í  vetur. Það er gaman að fá svona farfugla í hópinn, vonandi verður framhald á því. Vorið 2014 var 61 kona skráð í kórinn en, 55 af þeim virkar í starfinu.

Kóræfingar hafa oftast farið fram í Brekkuskóla. En eins og áður víkjum við ef skólinn er upptekinn og höfum þá leitað í hin skjólin okkar, þ.e. Hlíð, Lón og MA.

Fundir stjórnar voru 11 á starfsárinu. Auk þess var mikið um óformlega örfundi sem ekki voru skráðir.

 

Sagan 2012-2013

Alt 2 var í skemmtinefnd starfsárið 2012-2013

 

Breyting varð í stjórn Kvennakórs Akureyrar á aðalfundi kórsins 14. maí 2012. Soffía Pétursdóttir lét af störfum sem gjaldkeri kórsins og í hennar stað kom Anna Breiðfjörð Sigurðardóttir. Skipti þessi tóku þó ekki fullkomlega gildi fyrr en í desember 2012 sökum annríkis hjá Önnu. Áfram sátu í stjórn þær Arnfríður Kjartansdóttir, Eygló Arnardóttir, Kamilla Hansen og Una Þórey Sigurðardóttir.

Starfsárið 2012 – 2013 var ansi líflegt fram í desember en þeim mun rólegra eftir áramót. Í byrjun starfsárs voru skráðar 58 konur í kórnum. Ein hætti í haust en tvær bættust við -þannig að okkur fjölgaði um eina og skráðar konur því 59.

Árlegur haustmarkaður KvAk var haldinn laugardaginn 8. september í Hlöðunni við Litla Garð hjá fyrrum stjórnanda kórsins Þórhildi Örvarsdóttur. Boðið var uppá bakkelsi og sultur og svignuðu borðin undan ýmsum varningi. Að venju var einnig boðið upp á vöfflur og kaffi sem gestir og gangandi gæddu sér á undir indælum söng kórkvenna. Nokkur hagnaður var af deginum þótt ekki gildnuðu sjóðir kórsins mikið. En viðburður sem þessi er orðinn fastur liður í upphafi starfsárs, vekur athygli á kórnum auk þess að hrista kórfélaga saman.

Fyrsta æfing haustsins var sunnudaginn 16. september í Brekkuskóla. Að þessu sinni var ekki auglýst sérstaklega eftir nýjum konum en þess getið í bæjarmiðlum að sópranraddir væru sérstaklega velkomar í kórinn. Nokkrar nýjar konur mættu  á fyrstu æfingarnar og stoppuðu mislengi en af þeim ílengdust tvær konur.

Alt 2  var í skemmtilegu nefndinni þetta starfsár. Á liðnum vetri breyttust þær öðru hvoru í afar virðulegar dömur í félagsskap sem nefndist EVERYTHING TÚ.  Þær byrjuðu með stæl 30. september og buðu hinum óæðri röddum til teboðs fyrir æfinguna sem þann dag fór fram í Lóni. Í teboðinu kynntu dömurnar ,,iðrunarlaust, stórkostlega framtíðarsýn á skemmtidagskrá komandi vetrar,, .

Akureyrar akademían óskaði eftir söng kórsins laugardaginn 13. október. Kórkonur mættu galvaskar í Gamla Húsmæðraskólann við Þórunnarstræti og sungu nokkur lög við góðar undirtektir.

Kóradagur í Hofi var haldinn laugardaginn 27. október og tók Kvennakór Akureyrar þátt í dagskránni. Daníel kórstjóri var upptekinn þennan dag og kom Eyþór Ingi Jónsson í hans stað og stjórnaði kórnum með ágætum.

Þessa sömu helgi fór fram aðalfundur Gígjunnar,  landssambands íslenskra kvennakóra, í Reykjavík. Valdís Þorsteinsdóttir ásamt formanni mættu fyrir hönd KvAk á fundinn.

Mæðrastyrkstónleikarnir voru haldnir öðru sinni í Hamraborg Hofi 25. nóvember og hófust kl 16.  Meðsöngvarar að þessu sinni voru Eyrún Unnarsdóttir og Friðrik Ómar Hjörleifsson. Hljómsveitina skipuðu, Emil Þorri á slagverk, Aladár Rácz á flygil og Stefán Daði Ingólfsson á bassa.  Heiðursgestur á tónleikum var Jóna Berta Jónsdóttir en hún lét af störfum sem formaður mæðrastyrksnefndar á árinu. Tónleikarnir fóru vel fram og var góður rómur gerður að söng kórsins. Eftir tónleikana var haldið dömulegt jólakósýkvöld á Strikinu og snæddu kórkonur og kórstjóri súpu og nutu skemmtiatriða sem dömurnar í EVERYTHING TÚ sáu um. Nú bar svo við að erfiðara gekk að afla styrkja og varð upphæðin sem mæðrastyrksnefnd fékk heldur minni en árið 2012 eða kr 350 000. Það er mikil vinna að baki svona tónleikum og orðið ljóst að ekki svarar kostnaði að halda slíka tónleika í Hamraborg.

Sunnudaginn 9. desember sungu KvAk konur fyrir heimilisfólkið í Lögmannshlíð og tóku hefðbunda æfingu á sama stað á eftir.

Kórinn þátt í aðventutónleikum Karlakórs Eyjafjarðar sem fram fóru í Laugarborg 13. desember.  Ásamt fyrrrnefndum kórum tók Kirkjukór Laugalandssóknar þátt í tónleikunum. Þetta var hin besta skemmtun og virkilega gaman.

20. janúar 2013 hófust æfingar að nýju. Nýtt prógramm leit dagsins ljós, gamalt og nýtt í bland með fjölbreytni í fyrirrúmi.

Föstudaginn 1. febrúar söng  kvennakórinn ásamt Karlakór Akureyrar á þorrablóti í Hlíð og var þetta annað árið í röð sem kórarnir sameinuðust af þessu tilefni.

Vorfagnaður KvAk var haldinn í Pakkhúsinu, Hafnarstræti 19, föstudaginn 5.apríl. Það voru hinar hinar háæruverðugu dömur í EVERYTHING TÚ sem stóðu fyrir fagnaðinum og verður þessi skemmtun lengi í minnum höfð. Þemað var Indverskt, matur og búningar í samræmi við það.

Kórfundur var haldinn á undan æfingunni  7. apríl. Upphaflega átti að halda fundinn á haustönn en sökum ýmissa uppákoma frestaðist hann. Arnfríður Kjartansdóttir hafði veg og vanda af skipulagningu fundarins. Rætt var í hópum um fyrirfram ákveðin málefni er þóttu vera ofarlega í huga kórkvenna. Fundurinn þótti takast vel. Niðurstöður voru kynntar í lok fundarins og hefur stjórn einnig haft þessar niðurstöður til athugunar og lærdóms.

Á æfingunni 21. apríl sungum við óformlega fyrir heimilsfólk Hlíðar, þ.e. án stjórnanda, en   Þórunn Jónsdóttir sá um undirleik á gítar.  Þórhildur Örvarsdóttir sá um æfinguna í fjarveru Daníels og fór ítarlega i raddbeitingu.

Fjölumdæmis- þing Lionshreyfingarinnar á Íslandi var haldið í Hofi  helgina 10. -12. maí og söng kvennakórinn nokkur lög á lokahófi þingsins. Það var ágætis æfing fyrir vortónleikana síðar í mánuðinum.

Vortónleikar kórsins fóru fram helgina 25. – 26. maí. Laugardaginn 25.maí voru haldnir tónleikar í Blönduóskirkju og óku kórkonur til Blönduóss með rútu. Á leið vestur var stoppað í Varmahlíð og sungin nokkur lög fyrir gesti og gangandi. Fámennt en góðmennt var á tónleikunum á Blönduósi en söng kórsins var vel tekið af áheyrendum. Eftir tónleika var komið við á Heilbrigðisstofnuninni á Blönduósi og sungið fyrir heimilisfólkið þar. Að því loknu var snæddur kvöldverður á veitingastaðnum Pottinum. Undir borðum var slegið á létta strengi og létu dömurnar í EVERYTHING TÚ formlega af störfum í skemmtinefnd.  Daginn eftir eða sunnudaginn 26. maí hélt kórinn seinni tónleika sína í Hömrum Hofi. Þeir tónleikar tókust mjög, þeir voru teknir upp og gátu kórkonur fengið CD diska með þessum upptökum á kostnaðarverði.

Æfingadagar voru tveir á áætlun samkvæmt venju. Sá fyrri átti að vera 3. nóvember en endaði sem löng æfing 18.nóv. sökum veðurs og veikinda. Seinni æfingadagurinn var 2. mars og gekk samkvæmt áætlun. Jaan Alavere var Daníel til aðstoðar á seinni æfingadeginum og reyndist sú tilhögun vel. Sem fyrr var æft í Valsárskóla og notið staðgóðra veitinga hjá Kvenfélagi Svalbarðsstrandar.

Fjármál. Fjáraflanir voru í lágmarki. Haustmarkaðurinn  og sala á uppskriftabókinni voru einu fjáraflanir kórsins á árinu. Samningur náðist við Akureyrarbæ um aukinn styrk, er hann nú sambærilegur við styrk til KAG og samið var til þriggja ára. Norðurorka veitti styrki til samfélagsverkefna í ársbyrjun og fékk KvAk styrk upp á kr 150.000.-

Nefndastörf gengu ágætlega, allar nefndir voru mannaðar nema tónleikanefnd.  Eins og á síðast ári hefur verið lögð mikil og góð vinna í kynningar og auglýsingar.

Heimasíðan hefur verið í uppfærslu. Sú vinna hefur gengið hægt en örugglega. Formaður fundaði með völdum konum um samræmingu á nefnda og starfslýsingum á heimasíðu.

Kórpési fæddist á starfsárinu. Móðir hans og hugmyndasmiður er Madda (Margrét Einarsdóttir) í alt 2.  Pési er mesta þarfaþing og ætti að vera staðalbúnaður í tösku hverrar kórkonu. Í Pésa er að finna allar helstu upplýsingar um kórinn, auk netfanga og símanúmera kórkvenna.

Æfingastöðum kórsins hefur fjölgað. Eins og áður þurftum við stundum að víkja úr Brekkuskóla vegna uppákoma þar. Við höfum fengið inni í öldrunarheimilum Akureyrar og greitt fyrir greiðann með söng. Svo njótum við enn velvildar KAG, Karlakórs Akureyrar-Geysis. Í vetur höfum við sungið í Lóni, Hlíð, Lögmannshlíð, Laugarborg og nú síðast í MA.

Fundir stjórnar hafa verið allnokkrir á árinu eða alls 12.  Minna fór fyrir fundum með nefndum en formaður og stjórn voru í ágætum samskiptum við nefndarkonur.

Landsmót íslenskra kvennakóra verður haldið á vordögum 2014 og í vetur var landsmótsnefndin komin á fullt við að vinna að undirbúningi þess.

Kanadaferð 2012

Kvennakór Akureyrar fór í söngför til Kanada sumarið 2012 og tók meðal annars þátt í Íslendingadeginum í Gimli. Formaður kórsins skráði ferðasöguna.

Söngferðalag Kvennakórs Akureyrar til Kanada 2012

Kvennakór Akureyrar hefur það að markmiði sínu að fara erlendis í söngferð að jafnaði fjórða hvert ár. Haustið 2011 kom upp sú hugmynd hjá kórnum að fara á Íslendingaslóðir í Kanada og taka þátt í hátíðahöldum á Íslendingadeginum í Gimli. Ákveðið var að fara með ferðaskrifstofunni Vesturheimi sem sérhæfði sig í ferðum á Íslendinga slóðir í Vesturheimi. Það komu upp nokkur vandamál í skipulagningunni síðar um haustið og um tíma virtist sem ekkert yrði úr ferðinni. Iceland express hætti að fljúga til Winnipeg, ferðaskrifstofan varð gjaldþrota og á ýmsu gekk. En ekki gáfumst við upp og eftir töluverðar vangaveltur og kannanir var ákveðið að fara með ferðaskrifstofunni Bændaferðum og ferðin varð að veruleika.
Við tóku stífar æfingar og kórinn getur nú til dæmis sungið þjóðsöngva Íslands, Kanada og Bandaríkjanna rétt eins ekkert sé. Prógrammið var tvískipt, íslensk þjóðlög og blanda af erlendum lögum af ýmsu tagi. Ákveðið var að kórinn myndi syngja á þremur tónleikum; í Gimli, Riverton og Minneapolis, auk þess að taka þátt í hátíðahöldunum á Íslendingadeginum í Gimli. Í för með okkur konunum var að sjálfsögðu kórstjórinn okkar, Daníel Þorsteinsson og slatti af puntstráum. Puntstrá eru nánir aðstandendur eða áhangendur kvenna í Kvennakór Akureyrar, aðallega þó eiginmenn kórkvenna. Það er lögð sérstök áhersla fyrri hluta orðsins, það er – PUNT.
Við flugum til Minneapolis og ókum þaðan norður til Kanada. Reyndar þurfti kórinn að fljúga út í tveimur hollum með dags millibili en það kom ekki að sök, þær kaupglöðustu fóru í fyrri hópnum…. að sögn okkar sem seinna fórum. Hóparnir sameinuðustu í Minneapolis að kvöldi 3. ágúst, fyrri hópurinn var þá búinn að skoða sig aðeins um og versla.
Að morgni laugardagins 4.ágúst var lagt af stað til Kanada. Hrafnhildur Sigmarsdóttir var fararstóri í rútunni minni og Jónas Þór, aðalfararstjóri hópsins, í hinni. Það tók um einn og hálfan dag að aka norður til Winnipeg. Það fór vel um hópinn í tveim góðum 35 manna rútum. Það er ekki mikið um sextíu manna rútur á þessum slóðum í Ameríku, annað en á mjóu vegunum á Íslandi! Bilstjórarnir voru mjög liprir og elskulegir, vildu allt fyrir okkur gera.
Við kórkonur höfðum hlustað á Atla Ásmundsson ræðismann Íslands í Kanada segja frá Vestur Íslendingum. Ég man að hann sagði frá því að hann hefði fyrst vitað hvað cruise control var þegar hann fór þangað vestur. Það væri bókstaflega ekið í sömu átt heilu dagana. Og landslagið væri ; ,, að hugsa eitthvað flatt og fletja það svo enn meira út‘‘. Þetta var alveg rétt hjá honum, allavega séð með augum norðlensku daladótturinnar! Á leið norður sögðu fararstjórarnir frá upphafi búsetu Vestur Íslendinga á þessum slóðum. Ég man sérstaklega eftir því að Hrafnhildur varð hálf klökk þegar ekið var um sléttur Norður- Dakóta, bestu landbúnaðar héruð Norður Ameriku. Þar lá leið islensku landnemanna um og í stað þess að setjast þar að héldu þeir norður til Manitoba þar sem ýmsar hörmungar biðu þeirra. Á leiðinni til Grand Forks sem var næsti gististaður á leiðinni var áð í bænum Alexandríu og skoðað norrænt byggðasafn. Ýmislegt var þar öðruvísi en á íslenskum byggðasöfnum. Kórinn tók að sjálfsögðu lagið í kirkju í safninu og þar hljómaði íslenskur söngur jafnvel og heima.
Þriðji dagurinn rann upp og nú magnaðist spennan, Kanada var rétt handan við sjóndeildarhringinn. Það er ekki hægt að tala um, handan við næsta hól, þarna! Fararstjórarnir voru búnir að tala mikið um smámunasemi kanadísku landamæravarðanna. Ekkert áfengi mátti vera uppi og ekkert matarkyns, þeir væru meira að segja vísir til að skoða í töskur. Nú voru góð ráð dýr, það var eitthvað eftir af smá vínflöskum – jafnvel slatti í einum og einum koníaksfleyg í handfarangri. Við söngkonurnar máttum ekki drekka dropa af víni þar til eftir tónleika og ekki dugði að láta tollarana gera þetta upptækt. Það var því hellt vel upp á puntstráin áður en komið var að landamærunum! En svo gekk allt eins og í sögu, það kom í ljós að þarna var tollvörður af íslenskum ættum sem brosti út í bæði og lét við okkur eins og við værum nánir ættingjar. Til Winnipeg var komið um hádegi. Áður en haldið var áfram til Gimli var stoppað við þinghúsið og heilsað upp á Jón Sigurðsson, það er að segja minnismerkið. Þar heyrðum við söguna um deilurnar varðandi staðsetningu styttunnar.
Það var sérstakt að sjá alíslensk nöfn á sveitabæjum á leiðinni norður til Gimli og íslenska fánann við hún. Um kvöldið söng kórinn á hátíðatónleikum í Gimli, The Celebrity Concert, í Johnson Hall við góðar undirtektir. Þar voru meðal annarra gestir frá Íslandi til að mynda bæjarstjóri okkar Akureyringa og kona hans. Á tónleikunum var einnig Rósalind Vigfússon. Rósalind er vel þekkt í vestur íslensku samfélagi og einkum fyrir að stofna og stjórna barnakórum. Hún kennir börnum af vestur íslenskum ættum íslensku með söng. Mjög merkileg kona. Kórinn söng eitt lag eftir hana, Minni Íslands. Ljóðið er eftir Vestur Íslendinginn Böðvar Jakobsson. Þetta var í fyrsta sinn sem þetta lag er flutt af íslenskum kór og vakti mikla lukku. Eftir vel heppnaða tónleika var haldið aftur heim á hótel í Winnipeg.
Mánudaginn 4.ágúst var lagt eldsnemma af stað til Gimli enda stóð mikið til. Þennan dag var Íslendingadagurinn haldinn hátíðlegur í Gimli og Kvennakór Akureyrar tók fullan þátt í hátíðahöldunum. Íslendingadagurinn í Gimli á sér langa sögu eða allt frá árinu 1932. Við tókum fyrst þátt í heljarinnar skrúðgöngu, það var engin venjuleg skrúðganga. Við sátum á heyböggum sem voru upp á risastórum vagni eða trailer. Ekið var um götur Gimli í um eina klukkustund í langri lest annara ökutækja. Daníel kórstjóri var fremstur með nikkuna og kórkonur og puntstrá röðuðu sér beggja vegna eftir endilöngum vagninum. Við sungum eins og enginn væri morgundagurinn, ég hélt hreinlega að Daníel væri búinn að gleyma því að kórinn átti að syngja fallega á hátíðasamkomunni eftir hádegi. Vinsælasta lagið var án efa, á Sprengisandi. Það virtust margir kannast við það lag, enda kom í ljós að Rósalind var mikið með það lag í barnakórunum sínum. Kanadíski og íslenski fánarnir blöktu allstaðar og fólkið fagnaði ákaft. Okkur leið eins og drottningum, þetta var ógleymanleg upplifun. Eftir hádegi tók kórinn þátt í hátíðasamkomu, þar eru ýmsar venjur hafðar í hávegum, fjallkonan kemur í fullum skrúða, sungin lög eins og Fósturlandsins Freyja, Eldgamla ísafold og enska útgáfan – God save the Queen auk þjóðsöngva beggja landa. Og ótrúlega mikið af ræðum ! Það var glatt á í rútunum á heimleiðinni og mikið sungið, góður dagur á enda.
Þriðjudagurinn 5.ágúst rann upp og þá var farið í skoðunarferð til Nýja Íslands m.a til Árborgar og Mikleyjar. Í Árborg skoðuðum við byggðasafn sem tengdist landnemum á þessu svæði m.a. Íslendingum. Við heimsóttum einnig Rósalind og Einar Vigfússon á býli þeirra Drangey skammt frá Árborg. Einar er ekki síður merkilegur en Rósalind en hann er mjög þekktur fyrir listilegan útskurð, einkum fugla. Það var mjög eftirminnilegt að koma til Mikleyjar eða Hecla. Þar var áður alíslensk byggð. Þar hittum við Maxemine Ingals sem er af íslenskum ættum og vinnur við að sýna íslensku ferðafólki byggðina. Það var afar sérstakt að rölta um kirkjugarðinn á eynni. Það var rétt eins og að vera í íslenskum kirkjugarði. Íslensk nöfn og íslensk grafskrift. Við enduðum á söng í kirkjunni, sungum alíslenskan sálm frá sautjándu öld, Jesú mín morgunstjarna. Það var vel við hæfi. Dagurinn endaði á tónleikum í Riverton. Þar eins og allstaðar var tekið á móti okkur með kostum og kynjum. En það var mjög heitt inni og við vorum að kafna í skósíðum kórkjólunum. Ekki bætti úr að bæjarstjórinn í Riverton, Davíð Gíslason hélt sérlega langa ræðu í upphafi og héldum við kórkonur að nú væri okkar síðasta stund upprunnin. Kvennakór Akureyrar myndi hreinlega andast úr hita. En við lifðum þetta af og það var einstaklega gaman að syngja fyrir fólkið þarna. Þetta var svolítið eins og að vera með tónleika í rammíslensku félagsheimili á Íslandi. Á eftir svignuðu borðin undan vínartertum og öðrum kræsingum. Það voru þreyttar en ánægðar konur og puntstrá sem héldu aftur heim á hótel í Winnipeg.
Daginn eftir kvöddum við Kanada með trega í hjörtum og góðum minningum um einstaklega gestrisið fólk. Ferðalagið aftur til Minneapolis gekk vel. Við hittum aftur á brosmildan vestur íslenskan landamæravörð en nú Bandaríkja megin. Bílstjórarnir höfðu sjaldan farið jafn auðveldlega fram og til baka yfir landamærin. Gist var í bænum Fargó á leiðinni til Minneapolis. Kórkonur og puntstrá gerðu sér glaðan dag og slökuðu á eftir mikla keyrslu undanfarinna daga, söngur og harmonikkuspil ómaði langt fram á kvöld.
Við komum aftur til Minneapolis fimmtudagskvöldið 10. ágúst – með smá stoppi í Albertville Premium Outlet. Það var ekki amaleg staðsetningin á síðasta gististað ferðarinnar, Spring Hill Suites, verslunar miðstöðin Mall of the Amerika var rétt handan götunnar….. Kór og puntstrá eyddu síðustu dögum ferðarinnar í Minneapolis meðal annars við verslun, söng og siglingu á Missisippi.
Föstudagskvöldið 11.ágúst söng kórinn þriðju og síðustu tónleikana í ferðinni. Þeir tónleikar voru haldnir í Grace University Lutherian Church og voru á vegum Íslendinga félagsins í Minneapolis. Það var öðruvísi að halda tónleika í Minneapolis en norður í Kanada, einhvernvegin ekki eins mikil nánd við tónleikagesti. En eins og áður var söng okkar mjög vel tekið af þakklátum áheyrendum.
Næst síðasta dag ferðarinnar, laugardag 12 . ágúst, fór hópurinn í siglingu með fljótabát á Missisippi. Það var mjög gaman, snæddum dýrindis hádegisverð og um borð hljómaði lifandi banjótónlist. Við tókum að sjálfsögðu lagið fyrir aðra gesti á bátnum og á Missisippi fljótinu ómuðu um stund íslensk þjóðlög auk annara tónsmíða.
Síðdegis sunnudaginn 13. ágúst kvaddi Kvennakór Akureyrar og fylgdarlið Minneapolis og hélt heim eftir vel heppnaða söngför til Vesturheims.
Það er frábært að vera í góðum og samstilltum kór, að geta deilt gleði og sorg með kórfélögum. Að fara að auki í svona ferðalag með kórnum sínum er ómetanleg upplifun. Það er svo gaman, við kynnumst betur og það þjappar okkur enn betur saman.

Sagan 2011-2012

10 ára afmælistónleikar í Hömrum í Hofi

 Saga kórsins starfsárið 2011 – 2012

Á aðalfundi 11. maí 2011 varð töluverð breyting á stjórn en þá gengu þrjár konur úr stjórn, þær Snæfríð Egilson,  Ásdís Stefánsdóttir og  Una Berglind Þorleifsdóttir. Í þeirra stað komu; Arnfríður Kjartansdóttir, Eygló Arnardóttir og Kamilla Hansen. Áfram sátu Soffía Pétursdóttir og Una Þórey Sigurðardóttir.

Síðasta verkefni kórsins á starfsárinu 2010-2011 voru vortónleikarnir sem haldnir voru í Laugarborg sunnudaginn 22. maí.  Með kórnum söng Eyrún Unnarsdóttir messósópran. Náttúruöflin urðu til þess að andrúmsloftið í kórnum varð ansi dramatískt síðustu stundirnar fyrir tónleikana og ég hef grun um að hjarta þáverandi formanns hafi slegið nokkuð ört. Það byrjaði nefnilega að gjósa í Grímsvötnum með þeim afleiðingum að öllu flugi var aflýst á sunnudag og kórstjórinn staddur í Reykjavík  en tónleikarnir áttu að hefjast kl 16. En Daníel brást okkur ekki frekar en fyrri daginn, leigði bílaleigubíl í snatri og ók viðstöðulaust norður. Hann náði rétt mátulega að skipta um föt og var mættur á sinn stað á sviðinu í Laugarborg klukkan fjögur, rétt eins og ekkert hefði gerst. Eftir vortónleikana fóru kórkonur í langþráð sumarfrí.

Starfsárið 2011- 2012 var eitt af viðburðaríkustu árunum í sögu kórsins og rak hver viðburðurinn annan. Má þar helst nefna tíu ára afmæli kórsins,  veglega mæðrastyrkstónleika og fyrirhugaða ferð Kvennakórs Akureyrar á Íslendingaslóðir í Kanada í ágúst .

Fyrsta æfing haustið 2011 var haldin sunnudaginn 4. september í Brekkuskóla.  Áður hafði verið auglýst eftir nýjum konum í Dagskránni og einnig voru settar upp auglýsingar. Einnig voru kórkonur beðnar um að líta í kringum sig eftir álitlegum nýliðum í kórinn.
Þessi herferð bar ágætis árangur því það komu þó nokkrar konur í hópinn til okkar, bæði nýjar og eins konur sem höðu verið í kórnum á árum áður. Lögð var áhersla á það í byrjun starfsárs að halda vel utanum nýliðana strax í upphafi eiga raddformenn  og kórkonur allar þakkir skildar fyrir það. Eins og gengur týndist aðeins úr nýliðahópnum er leið á haustið og veturinn en langflestar héldu áfram.

Á haustdögum voru starfandi í kórnum um 66 konur, nokkrar kórkonur tilkynntu ótímabundin hlé og þrjár af nýliðunum hættu fyrir áramót. Um aðalfund að vori 2012 voru skráðar 59 konur í kórnum. Nokkrar konur sem ekki ætluðu að taka þátt í Kanadaför tóku hlé til hausts.

Árlegur haustmarkaður KvAk var haldinn í Hlöðunni á Hömrum laugardaginn 10. september. Var hann með hefðbundnum hætti, kórkónur mættu með ýmsan varning, s.s. fatnað, bækur, fjallagrös og þessháttar og þær sem ekki gátu lagt eitthvað til greiddu ákveðna upphæð. Boðið var upp á vöfflur og kaffi sem gestir og gangandi gæddu sér á undir indælum söng kórkvenna. En nú brá svo við að mjög lítið var af ætum varningi svo sem brauði og kökum. Kom þetta í kjölfar nýlegra reglugerða heibrigðisnefndar er bannaði sölu á heimatilbúnum mat nema úr heilbrigðisvottuðum eldhúsum. Það litla sem barst af brauði og sultum bókstaflega hvarf á augabragði.  Markaðurinn skilaði þó nokkrum hagnaði umfram kostnað.

KvAk konur mættu galvaskar í útvarpsþáttinn  Gestir út um allt  í Hofi sunnudaginn 6. nóv. Þar samdi og söng Ingó veðurguð hið rómaða lag um Kvennakór Akureyrar. Það var Snæfríð Egilson sem stóð fyrir þátttöku kórsins í þættinum og var það liður í því að auglýsa kórinn út á við.

Tíu ára afmæli kórsins var haldið með pomp og prakt laugardaginn 19. nóvember. Um undirbúning og framkvæmd sá sérskipuð afmælisnefnd undir styrkri stjórn Helgu Sigfúsdóttur. Afmælishátíðin byrjaði á veglegum tónleikum í Hömrum Hofi þar sem farið var yfir sögu kórsins frá upphafi í mæltu máli og söng. Æfingar kórsins frá í september höfðu miðast við að æfa úrval laga sem kórinn hafði sungið undir stjórn fyrri stjórnenda. Auk þess var frumflutt ljóð einnar kórkonunnar, Önnu Dóru Gunnarsdóttur við lag Daníels.  Kórinn söng við undirleik hljómsveitar sem sett var saman af þessu tilefni. Við  píanóið sat Aladár Rácz, Pétur Ingólfsson sá um bassann og Emil Þorri Emilsson um trommur. Helga Sigfúsdóttir sagði sögu kórsins og fór algerlega á kostum. Tónleikarnir tókust mjög vel í alla staði. Þess má geta að tónleikarnir voru teknir upp og var t.d. öllum stjórnendum kórsins fyrr og nú gefin upptaka með tónleikunum og sögu kórsins.

Um kvöldið mættu kórkonur ásamt mökum út í Hlíðarbæ þar sem haldin var heljarinnar veisla. Snorri Guðvarðar  sá um veislustjórn af sinni alkunnu snilld. Um skemmtiatriði sáu kórkonur sjálfar. Óllum að óvörum komu félagar úr Karlakór Akureyrar/Geysi og sungu nokkur lög fyrir veislugesti við góðar undirtektir. Að lokum var dansað fram á nótt við undirleik Snorra og hljómsveitar hans.

Mæðrarstyrkstónleikarnir voru  haldnir í Hamraborg í Hofi  8. desember. Þeir voru haldnir af miklum metnaði og fengum við söngfólkið Guðrúnu Gunnarsdóttur og Ívar Helgason í lið með okkur ásamt hljómsveitinni góðu frá afmælistónleikunum.  Allt tónlistarfólkið gaf vinnu sína og  voru Mæðrastyrksnefnd færðar kr. 560 þúsund í lok tónleikanna. Tónleikarnir heppnuðust mjög vel og höfðu áheyrendur orð á því að mikil orka og gleði hefðu streymt frá kórnum.

Jólasamvera var haldin í beinu framhaldi af síðustu æfingunni fyrir jól þann 11. des. Þar var fámennt en góðmennt og skemmtu kórkonur og Daníel sér góða stund við skemmtilestur auk þess að gæða sér á ýmsum kræsingum. Auk þess var nýja matreiðslubókin, Kvakandi krásir, kynnt.

Jólasöngur í miðbænum 17. des.  að beiðni Akureyrarstofu var síðasta verkefni kórsins fyrir jól.  KvAk konur sungu að venju fyrir framan Bláu könnuna í kulda og trekk og fengu sér svo heitt kakó á eftir ásamt Daníel.

Fyrsta æfingin á árinu 2012 var haldin 8. janúar í Brekkuskóla. Þá var byrjað að æfa nýtt prógram sem tók mið af væntanlegri Kanadaferð kórsins.

Jónas Þór fararstjóri og ferðaskipuleggjandi kom 26. janúar og kynnti væntanlega Kanadaferð fyrir kórnum en töluverðar breytingar höfðu orðið á fyrirkomulagi ferðarinnar frá upphafi. Í framhaldi af þeirri heimsókn ákváðu þó langflestar kórkonur að halda sínu striki og fara í ferðina þrátt fyrir breytta ferðatilhögun.

10. febrúar sungu KvAk konur ásamt félögum úr K.A.G. á þorrablóti í Hlíð við góðar undirtektir og sunnudaginn 25. mars var sungið fyrir vistfólk í Kjarnalundi og Hlíð.

Að beiðni Þjóðræknisfélags Íslands söng kórinn á kynningarfundi þess og Utanríkisráðuneytisins á Amtbókasafninu laugardaginn 31. mars. Auk þess að syngja hlustuðum við á frábæran fyrirlestur Atla Ásmundssonar (aðalræðismanns Íslands í Winnipeg) um Vestur – Íslendinga.

Sunnudaginn 6. maí  hélt kórinn tónleika í Siglufjarðarkirkju ásamt Karlakór Akureyrar/Geysi og félögum úr Karlakór Siglufjaðar.  Eftir sönginn fengu kórarnir súpu og salat á Kaffi Rauðku áður en haldi var heim á leið eftir vel heppnaða tónleika.

Vortónleikar voru haldnir í Laugarborg 29. maí.  Efnisskráin var tileinkuð ferð Kvennakórins á Íslendingaslóðir í Kanada. Prógrammið var fjölbreytt, blanda af íslenskum þjóðlögum ásamt nýjum og gömlum perlum.
Vortónleikarnir báru eins og áður sagði sterkan svip af því sem framundan var – söngferðalag á Íslendingaslóðir í Vesturheimi. Af því tilefni var tekin útimynd af kórnum með þjóðfánann og íslenska náttúru í baksýn, myndasmiður var Freydís Heiðarsdóttir en hún hafði einnig aðstoðað við myndatökur og vinnslu auglýsinga.

Kanadafarar héldu æfingum áfram fram að brottför, samtals voru haldnar fimm æfingar í júní og júlí. Auk æfinganna var haldinn einn undirbúningsfundur með Jónasi fararstjóra.

Kvennakór Akureyrar fór í söngferðalag til Bandaríkjanna og Kanada dagana 2-14. ágúst. Það er skemmst frá því að segja að ferðin tókst með miklum ágætum. Auk þess að taka þátt í hátíðahöldum á Íslendingadeginum í Gimli, söng kórinn á þrennum tónleikum, á hátíðatónleikum í Gimli, í Riverton og í Minneapolis við mjög góðan orðstý. Nánari ferðasögu má sjá hér.

Akureyrarkaupstaður átti 150 ára afmæli á árinu 2012 og aðalhátíðahöldin voru laugardaginn 1. september. Kvennakór Akureyrar tók þátt í hátíðadagskrá sem fram fór á Akureyrarvelli þann dag. Þar söng kórinn þrjú lög í mjög metnaðarfullri og velheppnaðri dagskrá.
Kórinn hóf aftur upp raust sína síðar um kvöldið og þá í Menningarhúsinu Hofi. Þar gafst þeim er áttu bókaða viðburði í Hofi á komandi mánuðum tækifæri til að kynna sig og vakti söngur KvAk jákvæða athygli hlustenda.

Dvalarheimilið Hlíð átti einnig afmæli á árinu 2012 og þar voru mikil hátíðahöld í byrjun september. Af því tilefni hélt KvAk  tónleika fyrir heimilsfólk Hlíðar fimmtudaginn 6. september þar sem kórinn söng sumarprógrammið við góðar undirtektir. Segja má að söngurinn í Hlíð hafi verið síðasti viðburðurinn á starfsárinu 2011 – 2012.

Æfingadagar kórsins á árinu voru tveir samkvæmt venju. Sá fyrri var 30. október en sá seinni 10. mars. Báðir æfingadagarnir voru haldnir í Valsárskóla og sá Daníel einn um að æfa okkur. Að venju sá Kvenfélag Svalbarðsstrandar um mat og drykk af sinni alkunnu snilld.

Fjáraflanir voru nokkrar á starfsárinu. Þar ber fyrst að nefna áðurnefndan markað í byrjun september. Svo var ráðist í eina kleinusölu á haustdögum. Auk þess var farið í jólakortagerð og sölu í desember auk þess að vera með söluborð í Bónus einn dag fyrir jól. En sú fjáröflun sem mestu skilaði og fékk auk þess jákvæðustu umfjöllunina var útgáfa uppskriftarbókar kórfélaga; Kvakandi krásir.  Fyrsta upplag seldist upp svo prenta þurfti meira. Valdís Þorsteinsdóttir hafði veg og vanda af útgáfunni en kórfélagar lögðu til uppskriftir.

Nefndir voru allar mannaðar að tónleikanefnd undanskilini.  Stjórnin fundaði með ferða- og fjáröflunarnefndum eftir þörfum og auk þess verið í ágætu sambandi við aðrar nefndir. Meira var lagt í kynningar á kórnum út á við en oft áður.  Landsmótsnefnd hóf vinnu fyrir væntanlegt landsmót  íslenskra kvennakóra hér á Akureyri vorið 2014.

Æfingar voru í Brekkuskóla en þennan vetur þurfti oft að víkja þaðan vegna ýmissa uppákoma m.a. viðgerða á sal. Þá var æft  í Hlíð og Dynheimum í Hofi, en mest þó í Lóni.  Gott samstarf var við Karlkór Akureyrar/Geysi varðandi lán á húsnæði og pöllum og í staðinn hjálpuðu KvAk konur tvívegis til við veisluhöld á þeirra vegum.

Fundir stjórnar frá aðalfundi 2011 voru 16 fundir, þar af 13 síðan stjórnarnskipti urðu í byrjun starfsárs 2011-2012.

 

Sagan 2010-2011

Saga kórsins og verkefni hans starfsárið 2010-2011

Við upphaf starfsársins 2010-2011 gengu úr stjórn þær Hafey Lúðvíksdóttur og Ragnhildur Ingólfsdóttir og í þeirra stað voru þær Una Þórey Sigurðardóttir og Una Berglind Þorleifsdóttir boðnar velkomnar í nýja stjórn ásamt Snæfríð Egilson, Ásdísi Stefánsdóttur og Soffíu Pétursdóttur.

Starfsemi haustsins hófst með markaði í Hlöðunni við Hamra og var hann haldinn þann 11. september. Þar var mikið um góðgæti og föt og ýmsa muni og „kór“ kvennakórsins söng nokkra slagara fyrir gesti og gangandi sem gæddu sér á indælis vöfflum og kaffi.

Fyrsta æfing starfsársins var 5. September  2010. Ekki var auglýst sérstaklega eftir nýjum konum en nokkrar konur komu þó til liðs við kórinn og voru um 60 konur í kórnum, þar af fjórar sem voru í fríi.  Æfingarnar voru haldnar sem fyrr í Brekkuskóla nema þegar víkja þurfti fyrir annarri starfsemi þar, þá var æft í Lóni, í Hömrum og í Hlíð.

Æfingardagar kórsins voru tveir á starfsárinu, sá fyrri var haldinn í Valsárskóla þann 2. október 2010. Þangað kom  Margrét Bóasdóttir og var með fræðslu og leiðbeiningar um það sem betur mætti fara. Þetta var sannarlega frábær dagur með fullt af nýjum hugmyndum og lærdómi . Síðari æfingardagurinn var svo haldinn  í Stórutjarnaskóla þann 2. apríl, þar var æft  frá klukkan 09:00 til að verða hálf sexog kröftunum eytt í að æfa landsmótslögin,  enda stutt í Landsmót kvennakóra á Selfossi.  Þessir æfingardagar hafa skipt mjög miklu og alltaf verið lærdómsríkir og skemmtilegir.

Kóradagur í Hofi  var haldinn í Hofi þann 23. október þar sem kórar af Norðurlandi Eystra tóku þátt og sungu allan daginn í Hamraborg. Þetta var einstaklega skemmtileg hugmynd og er á döfinni að viðhalda þessu sem hefð, enda tókst dagurinn einstaklega vel.

Áætlað var að fara í haustferð á Siglufjörð á haustdögum, og hafði ferðanefndin skipulagt góða ferð þangað með stoppi í Kalda og á söfnum. Veðurspáin var okkur frekar óhliðholl og var því ákveðið að hafa haustskemmtun á Vélsmiðjunni í „boði“ ferðanefndar í stað haustferðar. Mæting var afar góð og maturinn var „geggjaður“ og boðið var upp á ýmis skemmtiatriði sem bæði kórkonur og puntstrá sáu um.

Okkar árlegu Styrktartónleikar fyrir mæðrastyrksnefnd, voru haldnir þann 21. Nóvember 2010 og að þessu sinni með aðstoð  Æskulýðskórs  Glerárkirkju undir stjórn Olgu Ásrúnar Stefánsdóttur.  Tónleikarnir tókust vel, en aðsókn með minna móti.

Þann 5. desember voru haldnir jólatónleikarí Þorgeirskirkju í Ljósavatnsskarði  og þar var tekið á móti okkur með kaffi og meðlæti. Á þessum tónleikum söng  Eyrún Unnarsdóttir mezzósópran nokkkur lög með kórnum, alveg frábær söngkona þar á ferð. Tónleikarnir tókust einstaklega vel og þar var frumflutt  jólalagið Jólin sem Jaan Alavere hafði tileinkað kórnum við ljóð eftir Anítu Þórarinsdóttur. Eftir tónleika var svo farið í kaffi  á Fosshóliog kíkt á markaðsvörur og piparkökuhús. 

Árleg litlu-jól  voru haldin í  Brekkuskóla þann 12. desember í framhaldi af æfingu. Það mættu því miður ekki sérstaklega margar, en skemmtu sér engu að síður vel.

Síðasta verkefnið á árinu 2010 var svo söngur í miðbænum eftir beiðni frá Akureyrarstofu. Sungin voru nokkur lög fyrir framan Bláu könnuna í kulda og trekki, en tókst bara ágætlega og puntstráin hvöttu kórinn vel og vandlega til dáða.
Fyrsta æfing eftir áramót var haldin 9. janúar og tekist á við gömul og ný lög. Ákveðið var að halda tónleika á Góunni og því var tíminn vel nýttur til að æfa þau lög sem sungin yrðu þar.

GoRed dagur var haldinn á Hótel Kea þann 20. febrúar á konudaginn sjálfan og þar voru tekin nokkur valin lög í lok dagskrár.  Þetta var í annað skipti sem kórinn tók þátt í þessu  átaki til að vekja athygli á hjarta- og æðasjúkdómum kvenna.

Góutónleikar voru haldnir í Hofi þann 5. mars í salnum Hömrum og Eyrún Unnarsdóttir söng einsöng í nokkrum lögum. Þessir tónleikar voru með svolitlu breyttu sniði, þar sem inn á milli laga voru sagðar stuttar sögur og farið með ljóð tengd konum og góunni. Þessir tónleikar tókust einstaklega vel og var gerður góður rómur að söng og bundnu máli.  Eftir tónleika var snæddur kvöldverður á Vélsmiðjunni.
Að loknum þessum  tónleikum tóku við stífar æfingar og nú tekist  á við að æfa fyrir vortónleika og 8. landsmót íslenskra kvennakóra. Okkar þema varóperukórar og nú þurfti m.a. að takast á við að syngja á ítölsku og þýsku.

Svo var komið að því, Landsmót Kvennakóra á Selfossi helgina 29. Apríl – 1. Maí. Þátttaka frá Kvennakór Akureyrar var einstaklega góð, en 46 konur ásamt Daníel bjuggust til ferðar um hádegi á föstudegi og komu heim seint á sunnudagskvöldi. Tókst ferðin og mótið með eindæmum vel og allar voru þreyttar en ofurglaðar með góða ferð, upplifun og mikinn lærdóm. Kórinn fékk svo það hlutverk að halda næsta landsmót á Akureyri árið 2014. Frétt um ferðina má sjá HÉR.

Aðalfundurvar haldinn í Brekkuskóla 11. maí. Þá urðu talsverð umskipti í stjórninni þar sem formaðurinn Snæfríð Egilson lét af störfum, einnig varaformaður Ásdís Stefánsdóttir og meðstjórnandinn Una Berglind Þorleifsdóttir.  Í stað þeirra komu Arnfríður Kjartansdóttir, Eygló Arnardóttir og Kamilla Hansen, en áfram sátu Soffía Pétursdóttir og Una Þórey Sigurðardóttir.
Í undirbúningsnefnd fyrir landsmót kvennakóra 2014 voru kjörnar: Snæfríð Egilson, Anna Breiðfjörð og Hólmfríður Þorsteinsdóttir. Afmælisnefnd vegna 10 ára afmælis kórsins  var skipuð og í hana völdust: Helga Sigfúsdóttir, Helga Gunnlaugsdóttir, Inga Margrét Ólafsdóttir, Eygló Arnardóttir og Sóley Sturludóttir .
Fundir stjórnar ásamt fundum með nefndum voru 12 á á árinu. Stjórnin fór í vinnuferð í Illugastaði þar sem m.a. var gerð  „starfslýsing“ fyrir hverja nefnd sem verður aðgengileg á heimasíðu kórsins.

Vortónleikar voru haldnir í Laugaborg 22. maí og einsöngvari var Eyrún Unnarsdóttir, þar sem prógrammið var einstaklega skemmtilegt og fjölbreytt og tónleikarnir vel sóttir. Að þeim loknum hófst sumarfrí.

Sagan 2009 – 2010

Stjórnin var að mestu óbreytt frá síðasta starfsári, en Anna Lilja Stefánsdóttir gekk þó úr stjórn og Soffía Pétursdóttir kom inn sem gjaldkeri í hennar stað.

Áður en æfingar hófust hélt kórinn útimarkað á Marki Eyjafjarðarsveit.þann 1.september 2009. Þar voru til sölu föt, ýmsir munir og „haustafurðir“. Einnig var boðið upp á vöfflur með rjóma og kaffi. Veðrið var dásamlegt og gekk þessi dagur frábærlega.

Æfingar starfsársins voru sem fyrr í Brekkuskóla.  67 konur voru skráðar í kórinn og Daníel var áfram kórstjóri. Hann tók allar konur í raddprufur og þó að nokkurar eftirvæntingar og streitu gætti hjá nokkrum stóðu þær sig allar mjög vel.  Mikael Jón Clarke stjórnaði nokkrum æfingum í stað Daníels og skiluðu þær æfingar líka miklu. Sem fyrr voru raddirnar líka að hittast og æfa út af fyrir sig og var það mjög jákvætt og má gera meira af því.

Æfingardagar voru tveir þetta árið, fyrri æfingardagurinn var í Hrísey 24. október og var þá æft frá kl. 9:30 og ferjan tekin heim um kvöldmatarleytið. Þennan dag var mikið sungið en einnig mikið borðað en veitingahúsið Brekka sá til þess að við fengjum góða og mikla næringu. Síðari æfingardagurinn var svo haldinn í Valsárskóla 20. mars og auk þess að syngja með Daníel þann daginn fengum við fræðslu frá Valdísi Jónsdóttur talmeinafræðingu og var „röraaðferðin“ rifjuð upp. Svo kom Guðmundur Óli Gunnarsson og stjórnaði meðan Daníel sinnti öðrum störfum. Kvenfélag Svalbarðsstrandar sá til þess að við fengjum góða næringu. Þetta voru mjög lærdómsríkir og skemmtilegir dagar sem gáfu ótrúlega mikið, bæði sönglega og félagslega.

Jólatónleikar til styrktar mæðrastyrksnefnd Akureyrar voru haldnir 29. nóvember og fengum við til liðs við okkur Barnakór Hrafnagilsskóla og Kvennakórinn Sölku á Dalvík. Stjórnendur kórann voru auk Daníels, María Gunnarsdóttir og Margot Kiis. Aðsókn var ágæt og söfnuðust 350.000 krónur sem afhentar voru mæðrastyrksnefnd í lok tónleika.

Litlu jólin voru haldin í Lóni og átti skemmti- og árshátíðarnefnd veg og vanda af stórskemmtilegri skemmtun og góðum veitingum. Mættu allar í sínu fínasta pússi og með pakka , en Daníel ásamt Þórunni Jónsdóttur og Sigríði Huldu Arnardóttur spiluðu undir söng og einnig var gengið í kringum „jólaborðið“.

Sungið var á Dvalarheimilinu Hlíð þann18. desember og aftur í miðbænum daginn eftir þann 19. desember í miklum kulda.

Sú nýbreytni var að við sungum tvenna jólatónleika með Karlakór Dalvíkur milli jóla og nýárs. Fyrri tónleikarnir voru í Akureyrarkirkju kl. 16:00 þann 27. desember og fengum við standandi lófaklapp fyrir Tvær stjörnur. Seinni tónleikarnir voru í Dalvíkurkirkju kl. 21:00 sama dag. Kórkonur fylktu liði í rútu út á Dalvík en það reyndist hálfgerð æfintýraferð þar sem hitakerfið í rútunni var bilað og Anna Dóra gerðist sjálfboðaliði sem „vinnukona“. En tónleikarnir gengu mjög vel og í lokin buðu karlakórsmenn okkur í nýja menningarhúsið sitt Berg og þar sem boðið var upp á kaffi og konfekt.
Æfingar hófust síðan aftur 10. Janúar eftir jólafrí.

Árshátíð kórsins var haldin með pompi og prakt 13. mars og var undirbúningur og stjórn hennar í höndum Skemmti- og árshátíðarnefndar, en einnig höfðu raddirnar hver í sínu lagi æft eitt skemmtiatriði. Árshátiðin tókst alveg stórkostlega, góður matur og frábær skemmtun og áttu þær Eygló, Kamilla, Kristbjörg, Una Berglind, Una Þórey og Inga Magga allan heiður skilið fyrir frábæran undirbúning og skemmtun og við hinar fyrir frábær skemmtiatriði. Þess má geta að miðaverð á árshátiðina var hlægilega lágt og má það þakka góðri fjáröflun og stöðu kórsins.

Kórinn var beðinn um söng á konudaginn á degi Go Red þann 21. febrúar á Hótel Kea. Dagurinn er haldinn til að efla fræðslu um forvarnir og áhættuþætti hjarta- og æðasjúkdóma hjá konum. Kórinn söng í upphafi og lok dagskrár og fékk mjög góðar viðtökur.Mjög góð þátttaka kórkvenna var á þessum degi og mættu þær allar í einhverju rauðu sem og allir sem komu og hlustuðu á erindi og skemmtiatriði.

Aðalfundur Gígjunnar var haldinn 17. Október og mættu Ásdís og Snæfríð á hann. Sérstakur gestur á fundinum var Margrét Pálmadóttir, kórstjóri og ræddi hún við fundarkonur um hlutverk kvenna og að við þyrftum að vera duglegri að koma okkur á framfæri.
Fundir stjórnar voru um 11 talsins og þar með ekki taldir óformlegir fundir stjórnar og nefnda. Haldinn var almennur umræðufundur í Brekkuskóla til að kynna það sem framundan væri í kórastarfinu og fleira. Mæting hefði mátt vera betri, en við stefnum að því að hafa svona fundi í byrjun hvers starfsárs.

Fjáröflun hefur gengið ágætlega, en ákveðið var á síðasta aðalfundi að hækka félagsgjöldin í 2500 krónur á mánuði úr 2000 og er ætlunin að með því minnki þörfin á stöðugri fjáröflun. Eftir sem áður þarf þó að hafa ákveðna fjáröflun til að standa straum af útgjöldum og styrkjum til kórkvenna. Venja er að kórinn fari í ferðir og viljum við gjarnan halda því áfram en til þess að það sé hægt er nauðsynlegt að halda út fjáröflun. Einn kökubasar var haldinn á haustdögum á Glerártorgi, en því miður er nú alfarið búið að taka fyrir sölu á kökum þar. Ekki voru búin til ný jólakort þetta árið, en „gömlu“ jólakortin voru tekin upp, þeim pakkað að nýju og seld fyrir jólin og gekk það framar vonum.
Ómetanlegt er allar kórkonur séu virkar ogg nefndarkonur stóðu sig með stakri prýði og unnu gott og óeigingjarnt starf í þágu kórsins. Stjórnin hafðu fundi með meirihluta nefnda þennan vetur og þykja þeir fundir hafa styrkt samvinnu stjórnar og nefnda og gert nefndarstörfin sýnilegri.

Heimasíðan tók breytingum í vetur, en Aðalbjörg og sonur hennar Þórarinn Jóhannsson eiga veg og vanda að uppsetningu hennar. Sú nýbreytni varð að nú er lokað svæði á síðunni sem einungis kórkonur hafa aðgang að og hefur Aðalbjörg leiðbeint kórkonum um þessa nýju tækni. Hægt er að „spjalla“ þarna inni og er það góður möguleiki til skoðanaskipta. Einnig fengu formaður og gjaldkeri sín „eigin“ netföng á kvak.is

Kvennakór Suðurnesja kom í heimsókn helgina 7. – 9. maí og voru haldnir með þeim tónleikar í Laugarborg 8. maí og síðan boðið til kvöldverðar og skemmtunar á eftir. Tókst þessi heimsókn afar vel og gaman væri að endurgjalda heimsóknina við hentugleika.

Sungið var við messu í Akureyrarkirkju þann 15. maí og að síðustu voru haldnir vortónleikarnir 30. maí í Akureyrarkirkju. Að þessu loknu hófst sumarfrí.

Sagan 2008 – 2009

 

Sumarið 2008 hætti Arnór Vilbergsson kórstjórninni sem hann hafði haft með höndum í 3 ár. Þá hófst leit að nýjum stjórnanda, sem ekki tók langan tíma, því Jaan Alavere sem hafði verið úti með kórnum í Eistlandi þáði boðið um að gerast stjórnandi kórsins frá haustinu 2008.  Því miður sagði  Jaan starfi sínu lausu um áramót vegna veikinda. Enn hófst leit að nýjum stjórnanda og var þá Daníel Þorsteinsson fenginn til liðs við okkur frá febrúar 2009.

Starfsárið byrjaði annars með pompi og prakt 7.  september 2008.  Áður hafði kórinn þó tekið þátt í Akureyrarvöku í lok ágúst.
Útgáfutónleikar voru haldnir 10. október í Lóni þar sem geisladiskurinn var kynntur, en um leið var tækifærið notað til að kveðja Arnór og taka á móti Jaan.  Þetta voru flottir  tónleikar þar sem þeir kumpánar stjórnuðu báðir og seinna um kvöldið var horft á myndasýningu í  boði Helgu Gunnlaugsdóttur og Aðalbjargar og notið veitinga í  boði stjórnar og nokkurra kórfélaga.
Árlegir styrktartónleikar fyrir mæðrastyrksnefnd voru haldnir 30. nóvember. Þar nutum við liðsinnis Karlakórs Akureyrar Geysis og Söngfélagsins Sálubótar, Valmar Väljaots spilaði á píanó og Tarvo Nómm á bassa. Aldrei hafði áður safnast eins vel og nú og í lok tónleikana afhentum við stoltar Jónu Bertu 500.000 krónur.  Eftir þessa tónleika fór hluti kórkvenna og gæddu sér á dýrindis hlaðborði á La Vita Bella.
Á aðventunni hlaust kórnum sá stóri heiður að syngja á aðventutónleikum 6. desember með Sinfóníuhljómsveit Norðurlands, sem einnig hafði fengið einsöngvarana Dísellu Lárusdóttur og Jóhann Smára Sævarsson með sér. Þessir tónleikar tókust með eindæmum vel og var kórnum hrósað mikið fyrir góða frammistöðu,  en kórinn flutti m.a. annars lög eftir Jaan. Eftir tónleikana fór hluti af kórnum út að borða á Allanum með hljóðfæraleikurum og einsöngvurum og skemmtu sér konunglega yfir óvenjulegu en mjög góðu jólahlaðborði.
Litlu jólin voru einnig haldin á síðusta æfingardegi fyrir jól með hefðbundnu sniði.
Þórgnýr Dýrfjörð hjá Akureyrarstofu  bað um söng í miðbænum fyrir jólin og hittust  nokkrar konur úr kórnum með jólasveinahúfur og Jaan með nikkuna og sungu  fyrir gesti og gangandi í miðbænum í 10 stiga frosti. Að lokum fengum við fólk með okkur í að ganga í kringum jólatréð á Ráðhústorginu.

Haustönnin var þá á enda og  fyrsta æfing á nýju ári skipulögð  11. Janúar 2009.
Það fór þó á annan veg þar sem nú þurfti að finna nýjan stjórnanda eins og fyrr segir. Fyrsta æfing með nýjum stjórnanda varð ekki fyrr en 1. febrúar en fram að þeim tíma hafði kórinn hist og rætt málin, og einnig fengið Valdísi Jónsdóttur, talkennara til að koma og halda fyrirlestur um góða raddbeitingu, fræðslu um raddböndin og fleira og kynnti hún aðferð til að æfa raddböndin og þindina, svo kallaða röraaðferð.

Æfingarhelgar voru tvær á starfsárinu, 31. október hittist kórinn að Stórutjörnum og æfðu frá föstudegi til laugardags, og gistu í skólanum. Þetta var lærdómsrík og skemmtileg helgi þar sem einnig var pláss fyrir grín og gleði. Hin æfingarhelgin  fór fram í Brekkuskóla og Lóni, frá 13.-14. mars þar sem tekist var á við nýtt prógram ásamt nokkrum af lögunum okkar frá því um haustið. Þessi æfingardagur tókst líka mjög vel og var gott tækifæri til að kynnast nýjum stjórnanda. Á eftir var  boðið upp á Subway mat, gos og kökur.  Raddæfingar með stjórnanda voru nokkrar á starfsárinu og  kom Mikael Jón Clarke á tvær æfingar í forföllum Daníels.

Vortónleikar voru 2. maí í Laugaborg, og þangað komu um 100 gestir. Tónleikarnir gengu langt framar vonum og á eftir bauð kórinn upp á „afganga“ af 1. maí kaffinu og féll það í góðan jarðveg hjá tónleikagestum.  Um kvöldið var svo borðað saman og skemmt sér fram á nótt við söng og spil
Fundir stjórnar voru 11 á árinu og þá ekki meðtaldir óformlegir fundir stjórnar og fundir stjórnar og nefnda.

Á haustdögum var ákveðið að ráðast í að fá kórbúning á allan kórinn. Saumakompuna ásamt búninganefndinni hannaði flotta kjóla fyrir kórinn, sem fyrst voru notaðir í vorferðinni 2009 til Neskaupsstaðar.

Vinna nefnda var mjög góð, hafa þær unnið frábært starf og gert það að verkum að kórastarfið hefur gengið sem best fyrir sig.  Fjárjöflunarnefnd stóð fyrir 4 kökubösurum og einnig fékk kórinn það verkefni að vinna í Kjarnaskógi, verkefni sem var gaman að og öðruvísi að takast á við. Jólabasar var haldinn í Norðurporti þar sem seldar voru kökur og ýmis konar varningur, jólaskraut og fleira og þann 1. maí  var staðið fyrir frábæru kökuhlaðborði á hátíðasamkomu í Sjallanum  og fyrir það var greitt um 500.000 krónur.
Ferðanefndin sá til þess að konur gátu skemmt sér og farið áhyggjulausar í ferðalög á árinu, og þar má helst nefna Eistlandsferðina um sumarið 2008. Heimasíðunefndin sá til þess að upplýsingar og annað væri uppfært á heimasíðunni. Jólakortanefnd starfaði hjá kórnum og sá til þess að um jólin væri hægt að fá falleg jólakort með myndum eftir kórkonur og ekki síst falleg orð og ljóð með, sem er okkar aðalsmerki. Kaffinefndin sá til þess að þyrstar kórkonur gátu fengið sér kaffi í hléum, en breyting var þar á þegar ákveðið var að hætta við það. Nefndin starfaði þá áfram og sá um kaffi við önnur tækifæri. Raddformenn voru mjög virkir og sáu um að merkja við konur á æfingum og einnig að koma skilaboðum áfram eftir þörfum.

Vorferð var farin til Neskaupsstaðar helgina 5. – 7. Júní. Tókst sú ferð mjög vel, sungið var í Norðfjarðarkirkju á laugardeginum og voru tónleikarnir vel sóttir. Einnig var sungið við í sjómannadagsmessu á sunnudeginum ásamt kirkjukór Norðfjarðarkirkju og farið í siglingu um fjörðinn með báta- og skipaflotanum.
Kórinn tók einnig þátt í Akureyrarvöku og söng um borð í Húna ásamt Karlakór Akureyrar Geysi, en fjöldi manns var saman kominn við Húna til að hlýða á sönginn.

Starfsárið í heild var mjög skemmtilegt og annasamt en einnig erfitt,  en vilji allra var að vera með skemmtilegan kór og  metnaðarfulla dagskrá.

 

Eistlandsför 2008

Dagbók úr söngför Kvennakórs Akureyrar til Eistlands í júní 2008.

Kvennakór Akureyrar lagði af stað kl. 23:30 föstudaginn 20. júní með rútu frá Akureyri til Keflavíkur og var förinni heitið í tónleikaferð til Eistlands. Það var mikill hugur í kórfélögum og allt vel skipulagt og undirbúið af hinni ágætu ferðanefnd. Undir morgun var komið til Keflavíkur og flogið þaðan til Helsinki. Hópurinn sem fór var 74 manns, þ.e. söngstjórinn, kórfélagar og makar, en undirleikarinn og fararstjórinn Jaan Alavere var farinn á undan til síns heimalands. Eftir nokkurra klukkutíma stopp í Helsinki var farið með 2800 manna glæsiferjunni Galaxy til Tallin og ekið þaðan í náttstað til borgarinnar Pärnu, en þangað var komið um 23:45 að staðartíma, um það bil 21 klst. eftir að lagt var af stað frá Akureyri. Það verður að segjast eins og er að hópurinn var fljótur að hverfa til herbergja eftir venjulegan vinnudag á föstudegi og tæplega sólarhringsferðalag að auki.

1. tónleikar.
Sunnudaginn 22. júní héldum við svo fyrstu tónleikana í Methodistakirkjunni Agape Church í Pärnu.  Tónleikagestir voru milli 50 og 100 manns og var dagskránni afar vel tekið. Að tónleikum loknum var haldið til kvöldverðar að Restaurant Sunset sem er fallegur staður við ströndina. Sungið stanslaust um kvöldið, nema þeir sem fylgdust með fótboltaleik Spánverja og Ítala.
Veðrið hér í dag var eins og á góðum sumardegi á Íslandi.

Ferðalag milli borga.
Þann 23. júní hélt hópurinn frá Pärnu inn í landið til Tartu sem er 100 þúsund manna borg og næststærsta borg Eistlands. Ferðin þangað gekk vel þó að vegirnir væru afar mjóir og ósléttir þannig að  tveggja hæða rútan okkar ruggaði og valt eins og skip í stórsjó. Þennan dag héldu Eistar upp á Jónsmessuna og sjálfstæði sitt og fór hópurinn að sjálfsögðu að kíkja á hvernig það væri gert. Þrátt fyrir slagveðursrigningu þann daginn þá var farið á hátíðahöldin og var það eins og við manninn mælt að þegar allir voru komnir í regnföt og með regnhlífar  þá slotaði rigningunni  og jafnvel sólin gægðist fram. Heimamenn buðu fyrst upp á skemmtiatriði sem minnti á Ólaf liljurós í 100 og eitthvað erindum á eistnesku, en viðstaddir gæddu sér á grillpinnum og feitum pylsum með grænmetisívafi sem steikt var risagrillum og horfðu á snarkandi varðeld.

2. tónleikar
Þann 24. júní var dagurinn tekinn snemma og  mætt fyrir hádegi í kirkjuna Jaani Kirik og hitað þar upp fyrir örtónleika í hádeginu eða kl. 12.15.  Kirkjan er 900 ára gömul og hefur tvisvar verið lögð í rúst, síðast í seinni heimsstyrjöldinni. Þar sungum við 6 lög við góðar undirtektir, áhorfendur um 40 manns.  Klukkan 17:00 héldum við svo alvöru tónleika á sama stað og tókust þeir feiknavel, áhorfendur, sem voru á annað hundrað, fóru að þeim loknum klappandi út úr kirkjunni. Um kvöldið var farið í siglingu með M/S Pegasus eftir á einni í Tartu og þar var feiknamikið sungið og trallað. Að því loknu var kvöldverður á Atlantis og þar var einnig mikið sungið og gaman er að geta þess að þar voru staddir tónleikagestir frá því fyrr um daginn, þeir höfðu mætt í hádeginu og einnig kl. 17 og svo með okkur í mat. Að sjálfsögðu tókum við svo óskalög fyrir þessa nýju aðdáendur okkar.

Skoðunarferð um Suður-Eistland.
Miðvikudaginn 25. júni var alveg ágætis veður, það kom smá rignarskvetta en annars bara þurrt og þokkalegt og hiti á að giska 17 stig. Hópurinn dreif sig þá kl. 10:00 í ferðalag til Suður-Eistlands. Ekið var sem leið lá til Taevaskoja sem er afar fallegur staður við ána Ahja, þar má m.a. finna heilsulind sem sagt er að bæti alla kvilla og yngi mann upp. Var þar drukkið ótæpilega úr lindinni og að lokum óttuðust menn helst að kvennakórinn yrði orðinn að stúlknakór á næstu tónleikum. Staður þessi minnti okkur einn helst á Ásbyrgi, nema það að klettarnir eru úr ljósum sandsteini. Í ferðinni var einnig skoðaður ferðaþjónustubúgarðurinn Haanjamehe.
Næsti áfangastaður var hæsta fjall Eistlands, Suur Munamägi, heilir 318 metrar á hæð! Til þess að hækka fjallið aðeins settu Eistar þar upp turn allmikinn árið 1939 og hækkuðu hann svo 1959 þannig að þarna gátum við náð 346,7 metra hæð og virt fyrir okkur útsýnið úr turninum.

Haldið til Tallin.
Á fimmtudegi 26. júní  yfirgáfum við borgina Tartu og héldum til Tallin. Á leiðinni þangað hringdu þau Gestur Einar og Hrafnhildur í morgunútvarpi rásar 2 í varaformann kórsins, Agnesi Arnardóttur, til að fá fréttir af ferðalaginu og að sjálfsögðu var þá tekið lagið fyrir þau í beinni útsendingu.
Við komuna til Tallin var byrjað á því að fara í Rocca al Mare, en það er nokkurs konar Árbæjarsafn þar sem rakin er saga húsakosts og mannlífs frá 17. öld og fram undir okkar daga. Að því loknu var tekin önnur skoðunarferð undir leiðsögn eisneskra fararstjóra og nú í gamla bæinn í Tallin sem er alveg  stókostlegur. Að síðustu var svo farið með okkur á sönghátíðasvæðið Tallinna Lauluväljak (Tallin Song Festival Grounds) þar sem sviðið rúmar 15 þúsund manns og þar eru m.a. haldnar afar fjölmennar kórahátíðir og aðrar alþjóðlegar sönghátíðir. Við (52 konur)  mátuðum okkur á sviðið og tókum lagið með glæsibrag, en vorum afskaplega litlar á þessu risastóra sviði.

3. tónleikar.
Síðasti dagurinn hófst með æfingu kl. 10 í Pühavaimu kirkju. Síðan sungum við á torginu fyrir framan kirkjuna kortér fyrir kl 12, sem varð auðvitað til þess að fjöldi fólks fylgdi okkur inn í kirkjuna og hlustaði á tónleikana sem hófust kl. 12:00 á hádegi.  Þessir tónleikar tókust bara feiknavel og stöðugur straumur fólks var um kirkjuna á meðan við sungum, gróflega áætlað komu þar um 150 manns.
Að tónleikum loknum hófust búðarferðir, borgarskoðun eða kaffihúsarölt allt eftir smekk hvers og eins, síðan var sameinast í lokakvöldverði á veitingahúsinu Peppersack. Ferðin hafði verið aldeilis frábær og kvöddum við nú Eistland með tregablöndnum tilfinningum.

Heimferðin.
Laugardagurinn 28. júní var tekinn snemma, og ekið sem leið lá að brottfararstað ferjunnar Linda Express sem flutti okkur frá Tallin til Helsinki. Á hafnarbakkanum þar beið okkar fulltrúi rútufyrirtækisins sem skipulagði rútuferðirnar og færði Önu Korbar fararstjóra okkar blómvönd. Að sjálfsögðu sungum við þá fyrir hann í staðinn og að því loknu var okkur ekið á flugvöllinn í Helsinki. Þaðan flugum við svo til  Keflavíkur og lentum þar kl. 16:00 að íslenskum tíma. Flestir tóku þá rútuna heim til Akureyrar en aðrir fóru á eigin bílum eða með flugi. Það var frekar þreytulegur en ánægður hópur hópur sem steig út úr rútunni við Brekkuskóla kl. 23:15, enda liðnir 18 klukkutímar frá því ferðalagið hófst.
Óhætt er að segja að ferðin hafi tekist afbragðsvel, skipulag og fararstjórn var eins og best varð ákosið. Skoðunarferðir voru mjög fræðandi og vel til þeirra vandað og viðtökur hreint frábærar.