Laugardaginn 13. mars verður árshátíð kórsins haldin í Bjargi við Bugðusíðu. Árshátíðarnefnd starfar á fullu við undirbúning og hver rödd fyrir sig undirbýr skemmtiatriði. Síðan verður borðað og sungið og dansað fram eftir nóttu.

Laugardaginn 20 mars verður svo æfingadagur kórsins í Valsárskóla á Svalbarðsströnd. Þar verður æft frá 9 – 18 og einnig hlýtt á erindi frá Valdísi Jónsdóttur talmeinafræðingi sem ætlar að ræða um raddböndin, raddbeitingu og raddvernd og kenna kórfélögum aðferð til að þjálfa raddböndin og ná betri öndunartækni.

Kvennakór Suðurnesja kemur í heimsókn í maí og verða haldnir sameiginleigir tónleikar með þeim þann 8. maí.  Vortónleikar kórsins verða svo 30. maí n.k. en nánar verður sagt frá þessum  tónleikum síðar.

Nú eru komin drög að dagskrá kórsins á vorönn 2010 hér inn á heimasíðuna. Þar má sjá æfingaplan og dagsetningar á tónleikum o.fl. í starfi kórsins.  Einnig eru komnar inn myndir frá tónleikunum 29. nóv. og 27. des.

Kvennakór Akureyrar stóð fyrir sínum árlegu tónleikum til styrktar Mæðrastyrksnefnd Akureyrar þann 29. nóvember sl. Þetta var í 7. sinn sem kórinn hélt þessa tónleika og tókust þeir afar vel. Venjan er að kórinn fái góða gesti til liðs við sig og í þetta sinn voru það Kvennakórinn Salka á Dalvík og Skólakór Hrafnagilsskóla.

Allir sem komu að tónleikunum á einhvern hátt gáfu vinnu sína,auglýsingar voru fríar og ekki þurfti að greiða fyrir aðstöðuna í Akureyrarkirkju.

Í lok tónleikanna voru Ingu Ellertsdóttur frá Mæðrastyrksnefnd Akureyrar afhentar 350.000 krónur sem var afrakstur tónleikanna.

Kvennakór Akureyrar vill þakka öllum sem komu að þessum tónleikum og ekki síst frábærum tónleikagestum.

Æfingar hafa farið vel af stað nú í haust, Daníel Þorsteinsson stjórnar þeim eins og í fyrra, en síðasta sunnudag kom Michael J. Clarke og var með raddþjálfun.

Helgina 23. – 24. okt. verður nóg um að vera því að föstudaginn 23. okt verður kökubasar á Glerártorgi  kl. 15:00-18:00, eða meðan birgðir endast. Þessir kökubasarar kvennakórsins eru löngu orðnir frægir, kökurnar alveg með eindæmum góðar og renna út eins og heitar lummur.

Laugardaginn 24. okt. fer kórinn svo í æfingabúðir út í Hrísey og dvelur þar allan daginn við söng frá morgni til miðnættis eða þar um bil. Æfingadagar sem þessi eru haldnir ca 2svar á vetri og eru afar nauðsynlegir bæði til þess að ná betri árangri í söngnum og eins til þess að efla liðsandann.

Þegar nær dregur jólum verður hér sagt frá tónleikahaldi í desember, en dagsetningar á þeim má finna hér á síðunni undir Dagskrá.

Næsta sunnudag á sópran 1 og 2 að mæta kl. 16:00, en alt 1 og 2 á að mæta kl. 17:00.

Svona tilkynningar til kórfélaga munu framvegis birtast á svæði sem er einungis opið kórfélögum sem hafa skráð sig inn með notendanafni og lykilorði.

Kórfélagar! Nú er um að gera að skrá sig inn sem notanda.