Kvennakór Akureyrar heldur sína 10. tónleika til styrktar Mæðrastyrksnefnd Akureyrar á sunnudaginn kemur, en fyrstu styrktartónleikarnir voru haldnir 4. desember 2003. Síðan þá hafa fjölmargir kórar og tónlistarmenn tekið þátt í þessum tónleikum og hafa allir undantekningalaust gefið sína vinnu og ágóðinn því runnið beint til Mæðrastyrksnefndar Akureyrar.
Að þessu sinni fær kórinn liðstyrk góðra gesta, en það eru þau Eyrún Unnarsdóttir og Friðrik Ómar.

Eyrún Unnarsdóttir er fædd og uppalin á Akureyri og hóf hún sína tónlistarmenntun í Tónlistarskólanum á Akureyri. Eftir það stundaði hún nám í 5 ár við Tónlistarháskólann í Vínarborg undir handleiðslu Leopolds Spitzers og lauk þaðan tveimur diplómaprófum. Hún hefur sungið einsöng við fjölda tilefna hér á landi sem og í Vínarborg og tekið þátt í ýmsum  verkefnum og óperuuppfærslum. Til dæmis söng hún hlutverk seiðkonunnar í uppfærslu Hymnodiu á Dido og Aeneas eftir Henry Purcell sem flutt var í Hofi fyrr á þessu ári.

Friðrik Ómar Hjörleifsson er fæddur á Akureyri 1981, ólst upp á Dalvík frá árinu 1988, en flutti til Reykjavíkur 2003. Hann fór ungur að spila á trommur og önnur hljóðfæri, og um 10 ára gamall samdi hann sitt fyrsta lag. Friðrik Ómar hefur starfað með öllum helstu listamönnum þjóðarinnar og gefið út fjöldamargar plötur sem hafa selst í yfir 60 þúsund eintökum hér á landi. Friðrik Ómar sendi nýverið frá sér sína 5. sólóplötu sem ber heitið „Outside the ring“
Á tónleikunum annast undirleik hljómsveit sem skipuð er þeim Aladár Rácz á píanó, Stefáni Daða Ingólfssyni á bassa og Emil Þorra Emilssyni á slagverk.
Efnisskráin verður að vanda fjölbreytt og skemmtileg, bæði tónlist sem tengist aðventunni og einnig önnur lög sem kórinn hefur á efniskrá sinni. Friðrik Ómar og Eyrún syngja lög af sínum efnisskrám en kórinn syngur einnig með þeim í nokkrum lögum. Stjórnandi Kvennakórs Akureyrar er Daníel Þorsteinsson.
Kvennakór Akureyrar hvetur alla sem vettlingi geta valdið að taka nú höndum saman og styrkja Mæðrastyrksnefnd Akureyrar og hjálpa með því bágstöddum fjölskyldum fyrir jólin.  Um leið og tónleikagestir láta gott af sér leiða fá þeir að eiga notalega stund og hlýða á ljúfa ttónlist. Tónleikarnir verða  í Hamraborg í Hofi sunnudaginn 25. nóvember kl. 16:00. Miðasala er hafin í Hofi og á midi.is.

Nú styttist í Kórahátíðina í Hofi, en hún er næsta laugardag þann 27. okt.  Nánar um hátíðin má sjá á heimasíðu Hofs og þar er einnig tímaplan kóranna og fleira.  Kvennakór Akureyrar kemur fram kl. 13:10 en kórarnir syngja allir sameiginlega um kl. 15:30.  Þarna er boðið upp á samfellda tónleika frá kl. 10:30 til 16:00, aðgangur er ókeypis og hægt að koma og fara eins og hver vill á meðan á söngnum stendur.

Síðastliðið haust tók Kvennakór Akureyrar þátt í mikilli kórahátíð í Hofi.  Þessi viðburður þótti þá takast svo vel að hann verður endurtekinn nú í október, nánar tiltekið laugardaginn 27. október, og að sjálfsögðu verður Kvennakór Akureyrar aftur með. Fram koma 20 kórar af öllu Norðurlandi og koma þeir fram einn af öðrum frá kl. 10:00 og allt þar til þeir sameinast í einum stórum kór kl. 17:00 undir stjórn Eyþórs Inga Jónssonar. Þá flytja kórarnir sameiginlega þrjú lög, þar af tvö eftir heiðurstónskáld hátíðarinnar, Birgi Helgason.

Boðið verður upp á námskeið og fyrirlestur í Hömurm sama dag, auk þess sem Kóramarkaður verður starfræktur frá kl. 12 til 16, þar sem hægt verður að kynna sér og kaupa útgefið efni kóranna.

Aðgangur að hátíðinni er ókeypis og allir velkomnir. Nánar um hátíðina má sjá á: http://www.menningarhus.is/is/vidburdir-og-midasala/vidburdayfirlit/2012-2013/korahatid-i-hofi-1

Hér má sjá umfjöllun um fyrstu tónleika Kvennakórs Akureyrar í Kanadaförinni í ágúst:

http://www.lh-inc.ca/Article2.asp

Í dag var enn sem fyrr sólskin og hiti á okkur ferðalangana í Vesturheimi. Frábær sigling eftir Missisippi, hádegisverður um borð og lifandi tónlist.  Kórinn tók svo lagið við frábærar undirtektir annarra farþega og fólkið á árbökkunum sem þar sat i sólbaði, lék sér eða veiddi fisk, tók undir og dillaði sér í takt við músíkina, og ekki síst í laginu Lion sleeps tonight.                                                               Kvöldinu lauk svo á veitingastað niðri í bæ, þar sem menn gæddu sér á dýrindis amerískum nautasteikum. Næsta verkefni er svo að pakka niður, morgundeginum verður eytt að eigin vali og beðið eftir flugi um kvöldið, en áætluð koma til Keflavíkur er um kl. 6:30 á mánudagsmorgun.

Í kvöld sungum við síðustu tónleikana okkar í ferðinni og það var þreyttur en ánægður hópur sem settist niður i lobbyinu á hótelinu á eftir. Við sungum í fallegri kirkju á háskólasvæðinu í miðborginni og fengum fjölmarga þakkláta áheyrendur, flesta af íslenskum ættum, en einnig frá öðrum Norðurlöndum. Ræðismaður Íslands í Minneapolis dr. Örn Arnar bauð okkur velkomin og bauð öllum viðstöddum til veislu á eftr,  en Íslendingafélagið stóð fyrir veitingum. Þarna fengum við mjög góðar móttökur og áttum gott spjall við fólkið, sem var þakklátt fyrir tónleikana og bað okkur að koma sem fyrst aftur!

Miðvikudagur og fimmtudagur fóru í það að ferðast frá Winnipeg til Minneapolis og gist á leiðinni í Fargo. Einnig voru nokkrar búðir skoðaðar í Albertville Premium Outlet og i Mall of America sem er i 5 min fjarlægð frá hótelinu okkar Spring Hill Suites.                                                                                                   Í kvöld er svo komið að síðustu tónleikunum í ferðinni en þá verður sungið í Grace University Lutherian Church og að því loknu verður kvöldverður og móttaka í boði Íslendingafélagsins hér.

Kl.9 stundvíslega var ekið af stað frá Winnipeg norður á bóginn og stefnan tekin á Árborg. Himininn skafheiður og hitinn bærilegur, ca 25°.  Fljótlega blöstu við skilti með íslenskum bæjanöfnum og einhvern veginn vorum við að færast nær og nær Íslendingunum sem hingað fluttu á 19. öldinni. Í Árborg skoðuðum við minjasafnið Arborg & District Multicultural Heritage Village en þar gat að líta aðflutt hús íslenskra fjölskyldna, svo sem Sigvaldason House, Vigfússon House o.fl. Það var stórfenglegt að hitta í þessum húsum íslenskumælandi fólk sem sagði okkur sögu íbúa þeirra. Sum þeirra höfðu aldrei komið til Íslands og einn maður sagði okkur að hann hefði lært íslenskuna vegna þess að afi hans svaraði honum ekki ef hann talaði ekki íslensku! Í Árborg komum við einnig á heimili hjónanna Rosalind og Einar Vigfusson en þau eru miklir Íslendingar og taka á móti miklum fjölda íslenskra gesta. Rosalind stofnaði íslenskan barnakór og hefur komið með hann til Íslands. Einar er mikill tréskurðarmeistari og sker út og málar fugla og hefur hlotið verðlaun á heimsvísu fyrir.                              Frá Árborg var síðan haldið út í Mikley eða Hecla og er það hreint dásamlegur staður. Þar var skoðað minjasafn um veiðar í Winnipegvatni, ferðalangar voru fegnir að sjá vatn eftir allar slétturnar og sumir dífðu jafnvel tánum í. Þarna skoðuðum við hús, skóla og kirkju og tókum síðan lagið í kirkjunni.                        Næst var haldið til Riverton, snæddur kvöldverður, stutt æfing tekin og síðan tónleikar. Fjöldi manns mætti á tónleikana og sumir voru  jafnvel búnir að fylgja okkur eftir og mæta á alla okkar tónleika. Á eftir var kaffi og meðlæti þar sem við gátum spjallað við fólkið og margir gátu spjallað eða alla vega skilið íslenskuna. Ekki má gleyma því að á borðum í Árborg og Riverton voru m.a. á borðum kleinur, pönnukökur, randalín og hjónabandssæla!                                                                                                Það var þreyttur en alsæll hópur sem kom á hótel í Winnipeg kl 11, en samt var sest niður í lobbyi til að bera saman bækur sínar og gleðjast yfir vel heppnuðum degi og tónleikum.