Kvennakór Akureyrar og Kammerkórinn Ísold ásamt hljómsveit halda jólatónleika sína fimmtudaginn 14. desember í Akureyrarkirkju kl. 20:00.
Stjórnandi beggja kóra er Sigrún Magna Þórsteinsdóttir.
Miðaverð er kr. 3000,- en ókeypis fyrir börn undir 14 ára. Enginn posi.
Akureyrarstofa er styrktaraðili tónleikanna.
Starfsemin á þessu hausti hófst þann 10. september og stjórnandi kórsins er áfram Sigrún Magna Þórsteinsdóttir sem stjórnað hefur kórnum frá því í mars 2017. Æfingar eru á sunnudögum og kórfélagar eru um 65 talsins.
Aðalfundur var haldinn 17. september og var stjórnin sem starfaði á síðasta starfsári endurkjörin. Þórunn Jónsdóttir er formaður, Halla Sigurðardóttir varaformaður, Anna B. Sigurðardóttir gjaldkeri, Valdís Þorsteinsdóttir ritari og Margrét Ragúels meðstjórnandi.
F.v. Anna, Valdís, Þórunn, Halla og Margrét.
Æfingadagur var haldinn í Brekkuskóla 23 september og æft af krafti fyrir hausttónleikana sem síðan voru haldnir 8. október kl. 17:00 í Akureyrarkirkju. Klukkan 20:00 sama kvöld söng kórinn síðan í Bleikri messu í Akureyrarkirkju en slík messa er haldin þar árlega í október.
Að þessu loknu var tekið til við að æfa á fullu fyrir jólatónleikana sem haldnir verða 14. desember. Þessir tónleikar verða nánar auglýstir síðar en ljóst er að þar verður um að ræða fínustu skemmtun þar sem sungin verða bæði hefðbundin og óhefðbundin jólalög við undirleik góðra hljóðfæraleikara.
Dagskrá aðalfundar Kvennakórs Akureyrar 17. sept. 2017
1. Fundur settur.
2. Skipan fundarstjóra og fundarritara.
3. Lestur fundargerðar síðasta aðalfundar.
4. Skýrsla stjórnar og umræður.
5. Ársreikningar félagsins lagðir fram til umræðu og samþykktar.
6. Kosning tveggja skoðunarmanna ársreikninga og eins til vara.
7. Kosning stjórnar.
8. Lagabreytingar.
9. Önnur mál.
Kvennakór Akureyrar er í þann mund að hefja starf sitt þetta haustið. Sunnudaginn 10. september kl. 16:45 – 19:00 verður fyrsta æfing vetrarins og þá verður tekið hlýlega á móti nýjum kórkonum.
Meðfylgjandi auglýsing birtist í Dagskránni nú í vikunni.
Í vetur hefur kórinn haft tvær öflugar konur sem stjórnendur. Frá hausti og fram til 1. mars var það hún Sóla og síðan hún Sigrún Magna og hafa þær séð um að þjálfa okkur fyrir landsmót íslenskra kvennakóra og fleiri verkefni vetrarins.
Myndir og texti um Sólu má sjá hér og Sigrúnu hér.
Gígjan, landssamband íslenskra kvennakóra stendur fyrir landsmóti á 3ja ára fresti. Skemmst er þess að minnast að vorið 2014 var landsmótið haldið hér á Akureyri.
Að þessu sinni verður mótið haldið á Ísafirði 11. -13. maí og hefur Kvennakór Ísafjarðar veg og vanda af framkvæmd þess.
Mikil eftirvænting er hjá okkur í Kvennakór Akureyrar og munum við leggja land undir fót snemma morguns þann 11. maí og koma heim aftur að kvöldi 14. maí.
Dagskráin samanstendur af æfingum í smiðjum, sameiginlegum æfingum og tónleikum þar sem kórarnir koma fram með sína dagskrá svo og með sameiginlegum afrakstri úr smiðjunum.
Lokatónleikarnir verða á laugardeginum 13. maí og dagskránni lýkur síðan með hátíðarkvöldverði og mótsslitum.
Þorrablót íbúanna á Hlíð og Lögmannshlíð verða föstudaginn 3. febrúar og hefð er fyrir því að konur í Kvennakór Akureyrar taki þátt í þorrasöng af því tilefni.
Snorri Guðvarðsson stendur fyrir skipulagningunni á þessu að venju og fær með sér félaga úr kvennakórnum og Karlakór Akureyrar Geysi. Sungin verða létt lög sem allir kunna og vonandi taka þorrablótsgestir vel undir!
Snorri hefur lengi verið góðvinur Kvennakórsins og á meðfylgjandi mynd má sjá hann við undirleik á tónleikum kórsins í mars 2006.
Byrjað verður að syngja kl. 17:15 í Hlíð og síðan er farið yfir í Lögmannshlíð og sungið þar líka.
Norðurorka hf. veitir árlega styrki til samfélagsverkefna, en síðastliðinn föstudag veitti fyrirtækið styrki til 45 aðila og var heildarfjárhæð styrkja sjö milljónir króna.
79 aðilar sóttu um styrk að þessu sinni. Kvennakór Akureyrar var meðal þeirra sem fengu styrk, en hann verður nýttur til að fjármagna ferð kórsins á Landsmót íslenskra kvennakóra, sem haldið verður á Ísafirði í maí næstkomandi.
Kórinn þakkar Norðurorku innilega fyrir stuðninginn.
Frétt á vef Norðurorku er hér http://www.no.is/is/um-no/frettir/styrkir-nordurorku-til-samfelagsverkefna-2