Tónleikar 5. mars í Hofi

Þann 5. mars næstkomandi kl. 16:00 heldur kórinn tónleika í Hömrum, sem er minni salurinn í Hofi. Salurinn getur tekið 200 manns í sæti, í honum er mikil áhersla lögð á hljómburð og hentar hann vel til tónlistarflutnings bæði fyrir rafmagnaða og órafmagnaða tónlist, eins og segir á heimasíðu Menningarhússins Hofs.

Á efnisskrá verða eingöngu íslensk lög og einsöngvari verður Eyrún Unnarsdóttir, messósópran.

Nánari fréttir af tónleikunum koma hér síðar.

Kórinn kominn á fulla ferð eftir jólafríið

Æfingar hófust í dag, 9. janúar, eftir langt og gott jólafrí.  Dagskráin til vors er metnaðarfull og kórfélagar munu hafa í nógu að snúast.

Á vorönninni verða væntanlega haldnir tvennir tónleikar, þeir fyrri í febrúar/mars, en þeir síðari um mánaðrmót maí/júní og að minnsta kosti ein æfingahelgi verður á vorönn, þ.e. 2. – 3. apríl.

29. apríl – 1. maí verður farið á Landsmót íslenskra kvennakóra á Selfossi. Þar mun fjöldi kvennakóra leiða saman hesta sína og þar verður unnið í hópum með mismunandi tegundir af tónlist.  Kórarnir flytja hver og einn eitthvað af sinni dagskrá  en síðan verður sameiginleg dagskrá þar sem flutt verður m.a. sérstakt landsmótslag 2011, en það er sérstaklega samið af þessu tilefni.

Söngur í miðbænum – Gleðileg jól!

Laugardaginn 18. desember verður jólasöngur hingað og þangað um miðbæinn frá klukkan 15-17.30 þar sem fram koma kórar og tónlistarhópar af Eyjafjarðarsvæðinu.

Kvennakór Akureyrar syngur kl. 16:30 og syngur þar með jólin inn en tekur sér svo frí fram yfir áramót.

Kvennakór Akureyrar óskar velunnurum sínum, svo og landsmönnum öllum, gleðilegra jóla og heillaríks nýs árs og þakkar stuðning og hlýhug á árinu sem er að líða.

Tónleikar til styrktar Mæðrastyrksnefnd Akureyrar

Þann 21. nóvember heldur Kvennakór Akureyrar sína árlegu styrktartónleika fyrir Mæðrastyrksnefnd Akureyrar. Að þessu sinni fær kórinn til liðs við sig Æskulýðskór Glerárkirkju undir stjórn Olgu Ásrúnar Stefánsdóttur.

Efnisskráin er fjölbreytt, þar verða íslensk og erlend lög, bæði jólalög og ekki jólalög, þar sem enn verður rúmur mánuður til jóla þegar tónleikarnir eru haldnir. 

Tónleikarnir verða í Akureyrarkirkju 21. nóvember kl. 16:00.


Vel heppnað kóramót

alt
Kvennakór Akureyrar á kóramóti í Hofi 23. okt. 2010

Kóramótið í Hofi þann 23. okt. s.l. þótti takast með eindæmum vel og var það mál margra að gera þyrfti slíkt kóramót að árlegum viðburði í Hofi.
24 kórar tóku þátt í mótinu og áætlað var að um 700 manns hafi verið að syngja í Hofi þennan dag.  Áhorfendur voru einnig fjölmargir og líklega um eða yfir 500 þegar allir kórarnir sungu saman í lokin.
Dagskráin fór fram á stóra sviðinu og var salurinn, Hamraborgin,  opinn gestum og gangandi meðan á dagskránni stóð.
Á mótinu komu fram 8 kirkjukórar, 3 kórar eldri borgara, 4 aðrir blandaðir kórar, 5 karlakórar og 4 kvennakórar.
Kórarnir komu frá starfssvæði Eyþings sem er landshlutasamtök sveitarfélaga á Norðausturlandi frá Fjallabyggð að vestan að Langanesbyggð að austan, en innan Eyþings eru 13 sveitarfélög með liðlega 29.000 íbúa. Styrktaraðilar voru Menningarráð Eyþings, Rarik og Samband íslenskra karlakóra.

Kóramót í Hofi

Kvennakór Akureyrar tekur þátt í kóramóti sem haldið er í Menningarhúsinu Hofi laugardaginn 23. okt.  Alls taka 24 kórar þátt í dagskránni sem stendur frá kl 10:00 til ca 18:30.  Kórarnir, sem eru af öllum stærðum og gerðum, koma fram í 20 mín. hver og í lokin sameinast þeir og syngja allir saman. Sungið verður í salnum sem fengið hefur nafnið Hamraborgin og er hann opinn gestum og gangandi á meðan á dagskránni stendur.  Nánar um hvaða kórar taka þátt og niðurröðun þeirra má sjá hér.

Æfingadagur að baki

Laugardaginn 2. október var haldinn æfingadagur í Valsárskóla á Svalbarðseyri.  Æfingar hófust kl. 9 um morguninn og stóðu til kl. 17:30.  Að þessu sinnu fékk kórinn góðan gest, því að Margrét Bóasdóttir, sópransöngkona og margreyndur og lærður kórstjóri var Daníel til aðstoðar. Það er ekki ofsögum sagt að þetta kom mjög vel út, því Margrét fræddi kórkonur um ýmis praktísk atriði í söngnum og leiðbeindi einnig um það sem betur mátti fara. Í kaffi og matarhléum sáu kvenfélagskonur á Svalbarðsströnd um það að enginn væri svangur og voru veitingarnar hjá þeim aldeilis frábærar.
Framundan hjá kórnum er svo þátttaka í kórahátíð í Menningarhúsinu Hofi 23. október, en þar munu fjölmargir kórar koma fram allan liðlangan daginn og syngja síðan saman að lokum.
21. nóvember verða árlegir styrktartónleikar fyrir Mæðrastyrksnefnd Akureyrar haldnir í Akureyrarkirkju.