Þorrasöngur á Öldrunarheimilum

Þorrablót íbúanna á Hlíð og Lögmannshlíð verða föstudaginn 3. febrúar og hefð er fyrir því að konur í Kvennakór Akureyrar taki þátt í þorrasöng af því tilefni.

Snorri Guðvarðsson stendur fyrir skipulagningunni á þessu að venju og fær með sér félaga úr kvennakórnum og Karlakór Akureyrar Geysi. Sungin verða létt lög sem allir kunna og vonandi taka þorrablótsgestir vel undir!

Snorri hefur lengi verið góðvinur Kvennakórsins og á meðfylgjandi mynd má sjá hann við undirleik á tónleikum kórsins í mars 2006.

Byrjað verður að syngja kl. 17:15 í Hlíð og síðan er farið yfir í Lögmannshlíð og sungið þar líka.

Norðurorka veitir Kvennakórnum styrk

Norðurorka hf. veitir árlega styrki til samfélagsverkefna, en síðastliðinn föstudag veitti fyrirtækið styrki til 45 aðila og var heildarfjárhæð styrkja sjö milljónir króna.

79 aðilar sóttu um styrk að þessu sinni. Kvennakór Akureyrar var meðal þeirra sem fengu styrk, en hann verður nýttur til að fjármagna ferð kórsins á Landsmót íslenskra kvennakóra, sem haldið verður á Ísafirði í maí næstkomandi.

Kórinn þakkar Norðurorku innilega fyrir stuðninginn.

nordurorka_styrkir_til_samfelagsverkefna_2017

Frétt á vef Norðurorku er hér  http://www.no.is/is/um-no/frettir/styrkir-nordurorku-til-samfelagsverkefna-2

Aðalfundur og nýjar konur í stjórn

Á aðalfundinum var að venju kosið í stjórn. Úr stjórninni gengu Arnfríður Kjartansdóttir formaður og Sólveig Hrafnsdóttir varaformaður og var þeim þakkað fyrir þeirra framlag með lófataki.
Í þeirra stað komu inn í stjórninaþær Margrét Ragúels Jóhannsdóttir og Halla Sigurðardóttir.

Nýkjörin stjórn hittist á mánudagskvöld og skipti með sér verkum. Nýr formaður er Þórunn Jónsdóttir, varaformaður er Halla Sigurðardóttir, meðstjórnandi er Margrét Ragúels Jóhannsdóttir, gjaldkeri er Anna Sigurdardóttir og ritari er Valdís Þorsteinsdóttir. Mikill hugur var í stjórnarkonum og tilhlökkun að takast á við nýtt starfsár. Stjórnin mun hittast aftur fljótlega og ganga frá dagskrá vetrarins.

Vetrarstarf að hefjast með nýjum kórstjóra

Kvennakór Akureyrar byrjar starfið í haust af fullum krafti með fyrstu æfingu kórsins sunnudaginn 4. september.

Daníel Þorsteinsson sem stjórnað hefur kórnum frá því á vorönn 2009 sagði starfi sínu lausu í júlí og færum við honum bestu þakkir fyrir frábært starf og góðar samverustundir.

Í stað Daníels hefur verið ráðin Sólveig Anna Aradóttir, organisti og kórstjóri. Sólveig hefur lokið BA gráðu í skapandi tónlistarmiðlun frá Listaháskóla Íslands og kirkjuorganistaprófi frá Tónskóla Þjóðkirkjunnar.  Sólveig mun einnig stjórna kórum í Akureyrarkirkju og leysa þar af Sigrúnu Mögnu Þórsteinsdóttur.

Fyrsta æfingin verður eins og áður sagði sunnudaginn 4. sept. kl. 17:00 í Brekkuskóla. Reiknað er með að raddprufur fyrir nýja kórfélaga verði viku síðar, 11. september, en nánari auglýsing um upphaf starfsins birtist síðar.

Æfingarnar verða kl. 17:00 – 19:00 á sunnudögum í Brekkuskóla í vetur.